د طالبانو د بهرنیو چارو وزارت امریکا ته د تګ په تمه په قطر کې مېشتو افغانانو ته بلنه ورکړې، چې بېرته هېواد ته ستانه شي. طالبانو دا غبرګون تر هغه وروسته ښودلی، چې ګواکې امریکا غواړي دا کډوال افریقايي هېواد کانګو ته استوي.
د طالبانو د بهرنیو چارو وزارت نن شنبه د غويي پر ۵مه، په یوه اعلامیه کې ویلي، په افغانستان کې هېچا ته امنیتي ګواښ نشته او کډوال باید د امنیتي اندېښنو له امله خپل هېواد پرېنږدي. په اعلامیه کې له ټولو هغو افغانانو چې په قطر کې له نامعلوم برخلیک سره مخ دي، غوښتل شوي چې بېرته خپلې خاورې ته راوګرځي.
طالبانو زیاته کړې چې که څوک بل هېواد ته د تګ اراده لري، باید له قانوني او عزتمنو لارو دا کار وکړي.
وزارت ټینګار کړی چې دوی چمتو دي د قونسلي اړیکو او منظم میکانیزم له لارې د افغانانو د حقونو د ساتنې په برخه کې له نورو هېوادونو سره همکاري وکړي.
دا څرګندونې وروسته له هغه کېږي چې نیویارک ټایمز د باخبره سرچینو له قوله راپور ورکړ، چې د امریکا ولسمشر ډونالډ ټرمپ پلان لري د ۴۰۰ ماشومانو په ګډون شاوخوا ۱۱۰۰ افغان کډوال له قطر څخه کانګو ته ولېږدوي. په دې ډله کې د امریکا د پوځ پخواني ژباړونکي، کمانډو سرتېري او د هغوی کورنۍ شاملې دي چې له کلونو راهیسې په قطر کې د امریکا د ویزو انتظار باسي.
