د ایران دولتي ټلویزیون راپور ورکړی، چې د دغه هېواد د بهرنیو چارو وزیر عباس عراقچي په اسلاماباد کې د پاکستان د پوځ له مشر عاصم منیر سره د لیدنې پرمهال له امریکا سره د مذاکراتو په اړه د تهران ځوابي وړاندیزونه ورسپارلي دي.
د ایران د صدا او سیما شبکې راپور ورکړی، چې عباس عراقچي د پاکستان د پوځ له مشر سره په خبرو کې، د هغو وړاندیزونو په اړه د تهران ځوابي دریځ شریک کړی چې مخکې د پاکستان له لوري د امریکا سره د مذاکراتو په تړاو ورکړل شوي وو. د راپورونو له مخې، دا ځواب ډېر هر اړخیز دی او د تهران ټولې غوښتنې او اندېښنې په کې ځای پر ځای شوې دي.
د امریکا د عدلیې وزارت د نیویارک په سویلي ولسوالۍ کې د پاکستاني الاصله ډاکټر پر ضد مدني دعوه ثبت کړې، چې موخه یې د هغه د امریکايي تابعیت لغوه کول دي. دغه ډاکټر د ماشومې د جنسي ځورونې په یوه جدي قضیه کې په ۱۷ کلونو بند محکوم شوی.
د امریکا د عدلیې وزارت ویلي چې په نیویارک کې یې د یوې ثبت شوې قضیې په ترڅ کې د پاکستاني الاصله ډاکټر پر ضد مدني دعوه وړاندې کړې، څو د هغه د تابعیت لغوه کېدل وڅېړل شي.
په راپور کې ویل شوي چې یاد ډاکټر له ۲۰۰۷ تر ۲۰۱۳ کال پورې د یوې ۱۱ کلنې نجلۍ په جنسي ځورونه تورن شوی و.
چارواکي وایي چې نوموړی په ۲۰۱۵ کال کې نیول شوی او وروسته د فدرالي محکمې له لوري په ۱۷ کلونو بند محکوم شوی دی.
د عدلیې وزارت په وینا، په نوموړي تورونه د ماشومې اړ کول، جنسي ځورونه، له امریکا بهر د ماشومانو د جنسي استثمار هڅې او د ماشومانو د فحش موادو په جوړولو او درلودلو پورې اړوند وو.
محکمې ته وړاندې شوي اسناد ښيي چې تورن کس په ۲۰۱۶ کال کې خپل جرمونه منلي او د امریکايي فدرالي قانون له مخې پرې د بند سزا اورول شوې ده.
اوس د امریکا حکومت د هغه د تابعیت د لغوه کولو په موخه قانوني اقدام پیل کړی، څو د تابعیت د ترلاسه کولو پر مهال د جرمونو د پټولو موضوع وڅېړل شي.
دملګرو ملتونود خوړو نړیوال سازمان تازه راپور ښيي چې پاکستان د نړۍ له لسو تر ټولو زیانمنو هېوادونو څخه دی، چې شاوخوا ۱۱ میلیونه وګړي پکې له جدي لوږې او د خوړو له سخت کمښت سره مخ دي.
د ملګرو ملتونو د خپاره شوي راپور له مخې، په ۲۰۲۵ کال کې شاوخوا ۱۱ میلیونه پاکستانیان د خوړو له جدي کمښت سره مخ وو، چې له دې ډلې ۹،۳ میلیونه کسان د خوړو د بحران له جدي کچې او نږدې ۱،۷ میلیونه نور د بیړني حالت له لوړې کچې سره مخامخ شوي دي.
راپور څرګندوي چې دغه وضعیت د خوارځواکۍ د کچې د زیاتوالي لامل شوی او په ځانګړي ډول د بلوچستان، خیبر پښتونخوا او سند ایالتونه تر ټولو ډېر اغېزمن شوي دي.
د راپور له مخې، سخت اقلیمي بدلونونه، پرلهپسې سېلابونه او اقتصادي ستونزې د خوړو د کمښت اصلي عوامل بلل شوي، چې د میلیونونو خلکو ژوند یې له خطر سره مخ کړی دی.
په راپور کې ویل شوي چې ډېری اغېزمن کسان د خوارځواکۍ په درېیم او څلورم پړاو کې شامل دي، چې دواړه د بحران له سختو کچو شمېرل کېږي.
همدارنګه، راپور ټینګار کوي چې په پاکستان کې د خوړو بحران نه یوازې ځايي اوسېدونکي اغېزمن کړي، بلکې هلته مېشت افغان کډوال هم له همدې ستونزو سره مخ دي.
د ملګرو ملتونو په وینا، پاکستان د هغو هېوادونو له ډلې دی چې د کډوالو لوړه کچه لري، او همدې وضعیت د خوړو بحران نور هم ژور کړی دی، په داسې حال کې چې د یادو ایالتونو روغتیايي او تغذیوي ستونزې د اندېښنې وړ بلل شوې دي.
د اوکراین ولسمشرولادیمیر زیلنسکيوایي چې د روسیې د وروستیو بریدونو له امله لږ تر لږه څلور کسان وژل شوي او تر ۳۰ډېر ټپیان دي. نوموړي ټینګار کړی چې د وضعیت د کنټرول لپاره د هوايي دفاع عاجله پیاوړتیا او پر مسکو د نوو بندیزونو لګول اړین دي.
د اوکراین ولسمشر ولادیمیر زیلنسکي ویلي چې د روسیې د تازه بریدونو په پایله کې د دنیپرو ښار کې ۱۱ تنه په روغتونونو کې بستر دي او د یوې استوګنیزې ودانۍ پر نښه کېدو وروسته د ژغورنې عملیات لا هم روان دي.
هغه زیاته کړې چې ښايي یو شمېر کسان لا هم د ودانۍ تر کنډوالو لاندې بند پاتې وي. د نوموړي په وینا، روسیې نږدې ټوله شپه پر دنیپرو او د اوکراین پر نورو ښارونو او ټولنو بریدونه کړي دي.
زیلنسکي ویلي: «تر دې دمه له ۳۰څخه ډېر کسان ټپیان شوي او په چرنیهیف، اودیسه او خارکیف سیمو کې هم مرګژوبله اوښتې ده.»
هغه ټینګار کړی چې په دغو بریدونو کې د استوګنې ودانۍ، د انرژۍ تاسیسات او سوداګریز مرکزونه زیانمن شوي دي او زیاته کړې یې ده: «د روسیې تکتیکونه نه دي بدل شوي، د بېپیلوټه الوتکو، کروز توغندیو او بالستیک توغندیو کارول دوام لري.»
د اوکراین ولسمشر له خپلو نړیوالو شریکانو غوښتي چې بېړني او پرېکنده اقدامات وکړي. هغه ویلي: «موږ اړتیا لرو چې خپله هوايي دفاع ژر تر ژره پیاوړې کړو.»
زیلنسکي همداراز پر روسیې د اروپايي اتحادیې د بندیزونو د نوې، ۲۱مې کڅوړې د تصویب غوښتنه کړې او ویلي یې دي چې د بندیزونو ځنډ مسکو ته وخت ورکړی چې ځان عیار کړي.
هغه زیاته کړې چې د دغو بندیزونو اساسي هدف باید د روسیې د پوځي-صنعتي کمپلکس وړتیاوې محدودول وي.
د پاکستان د فدرالي څېړنو ادارې (FIA) د بلوچستان د انساني قاچاق ضد څانګه وایي چې په کوټه ښار کې د ترسره شویو عملیاتو په ترڅ کې یو تن تورن کس نیول شوی چې د افغان کډوالو د ناقانونه لېږد او قاچاق له یوې منظمې شبکې سره تړاو لري.
د دغه ادارې چارواکي وایي چې په دغه ایالت کې یې د انسان قاچاق پر ضد عملیات چټک کړي دي.
د چارواکو په وینا، د کوټې ښار د لوېدیځ بای پاس په سیمه کې د پټو معلوماتو پر اساس عملیات ترسره شوي چې په پایله کې یو تن تورن کس نیول شوی دی.
نیول شوی کس ثناءالله نومېږي، او د فدرالي څېړنو ادارې په وینا هغه د انساني قاچاق یوې منظمې شبکې غړی دی چې د افغان کډوالو د ناقانونه انتقال په قضیه کې ښکېل دی.
چارواکي زیاتوي چې د نیول شوي کس د موبایلونو محتویات، چټونه، انځورونه او ثبتونه ښيي چې هغه د خپلو نورو ملګرو سره په ګډه د افغان کډوالو په ناقانونه لېږد کې لاس درلود.
د چارواکو په خبره، تورن کس له افغانستان د سپین بولدک سیمې له ځینو انساني قاچاقبرانو سره مستقیمې اړیکې لرلې، او د همدې شبکې له لارې یې د خلکو د ناقانونه لېږد چارې تنظیمولې.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ ۸۸۸ کډوالې کورنۍ چې ټول ۴۶۷۳ کسان کېږي، له ایران او پاکستان نه افغانستان ته ستنې شوې دي.
د دغه کمېسیون د راپور له مخې، دغه کډوال د ننګرهار د تورخم، د کندهار د سپین بولدک، د هرات له اسلامکلا او د نیمروز د ورېښمو پله له لارې ستانه شوي دي.
راپور زیاتوي، له یادو کورنیو څخه ۶۸۴ کورنۍد تورخم له لارې، ۱۱۳کورنۍ د وریښموپله له لارې، ۶۲کورنۍد سپین بولدک له لارې، ۲۸ کورنۍ د اسلامکلا له لارې او یوه کورنۍ د بهرامچې له لارې افغانستان ته ستنې شوې دي.
د کمېسیون د معلوماتو پر بنسټ، راستنو شویو کورنیو سره د اړتیا وړ مرسته هم شوې ده.
دا په داسې حال کې ده چې په پاکستان کې د افغانانو فکري خوځښت د رهبرۍ شورا له نړیوالو سازمانونو او ملګرو ملتونو څخه غوښتنه کړې، چې په پاکستان کې د افغان کډوالو د حقونو د خوندي کولو لپاره جدي ګامونه پورته کړي.
بلخوا، د ملګرو ملتونو د استوګنې پروګرام ویلي چې افغانستان ته د کډوالو د پراخه څپو پر راستنیدنې د افغانستان ۱۰سلنه نفوس ډیر شوی.