د طالبانو کورنیو چارو وزارت وایي چې د هېواد په بېلابېلو ولایتونو کې د ترسره شویو عملیاتو په ترڅ کې ۸۰ کسان د نشهيي توکو د قاچاق او خرڅلاو په تور او د کابل په بګرامیو ولسوالۍ کې ۵ نور کسان د غلا او نشهيي موادو د ساتلو په تړاو نیول شوي دي.
د طالبانو د کورنیو چارو وزارت خبر ورکړی چې امنیتي ځواکونو د هېواد په بېلابېلو ولایتونو کې د نشهيي توکو د قاچاق او پلور پر ضد عملیات ترسره کړي، چې په پایله کې ۸۰ تنه نیول شوي دي.
د یاد وزارت په وینا، له نیول شویو کسانو سره له ۸ کیلوګرامو زیات چرس، ۳۶۰۰ د نشهيي ګولۍ او یوه اندازه شیشه هم ترلاسه شوې ده.
همدارنګه د کابل امنیه قوماندانۍ ویلي چې د بګرامیو ولسوالۍ په جلا عملیاتو کې ۵ نور کسان د غلا او نشهيي ګولیو د ساتلو په تور نیول شوي دي.
د قوماندانۍ په وینا، له دغو کسانو څخه یوه تومانچه، چاقو او ۵۰۰ د نشهيي ټابلیټ کا ګولۍ هم ترلاسه شوې دي.
مسوولین وایي چې نیول شوي کسان د هېواد د بېلابېلو ولایتونو لکه کندهار، کونړ، ننګرهار، کاپیسا، کندز، سمنګان، بامیان، پروان، لغمان، بغلان، جوزجان، فراه او خوست څخه دي، او د قانوني چلند لپاره اړوندو ادارو ته سپارل شوي دي.
