د طالبانو د سرحدونو، قومونو او قبایلو چارو وزیر ملا نورالله نوري وايي، چې مغرضې کړۍ په افغانستان کې قوي «اسلامي نظام» نه شي زغملای او د یادې ډلې پر لاسته راوړنو سترګي پټوي.
د طالبانو د سرحدونو، قومونو او قبایلو چارو وزارت د شنبې په ورځ، د یوې خبرپاڼې په خپرولو سره ویلي، چې ملا نورالله نوري په سمنګان ولایت کې په یوه لويه غونډه کې ګډون کړی.
یادې غونډې ته د وینا پر مهال نورالله نوري زیاته کړې:« مغرضې کړۍ په افغانستان کې مستحکم اسلامي نظام نه شي زغملای او هڅه کوي چې د طالبانو په تر سره کړیو خدمتونو سترګې پټې کړي.»
نوموړي ویلي، چې طالبان د خپلو دښمنانو دسیسو ته ځیر دي او په بېلابېلو برخو کې د پرمختګ ګامونه اخلي.
نوموړي د خپلو خبرو پرمهال له هېواده بهر افغانانو ته هم د افغانستان ته د ورتګ بلنه ورکړې ده.
که څه هم نوموړي د مغرضې کړۍ په اړه د کوم هېواد یا ډلې نوم نه دی په ډاګه کړی، خو نوموړي تردې وړاندې ویلي، چې پاکستان غواړي ډیورنډ کرښه په سرحد بدله شي، خو داسې به ونه شي. هغه ویلي و، چې دوی له چا سره د جګړې اراده نه لري، خو د هېواد دفاع د سر په بیه کوي.
