سپینه ماڼۍ: له ایران سره د خبرو دوام لپاره ځانګړی پلاوی اسلاماباد ته ځي
د امریکا سپینې ماڼۍ اعلان کړی چې د ولسمشر ډونالډ ټرمپ ځانګړی استازی سټیو ویټکاف او د هغه سلاکار جارد کوشنر نن اسلاماباد ته سفر کوي، څو د پاکستان په منځګړیتوب د ایران او امریکا ترمنځ د خبرو اترو په بهیر کې ګډون وکړي.
د سپینې ماڼۍ په وینا، دا سفر د هغو هڅو برخه ده چې هدف یې د ایران او امریکا ترمنځ د روانو خبرو اترو تسهیل او د دواړو لورو ترمنځ د نظرونو تبادله ده.
د سپینې ماڼۍ ویاندې کارولین لیویت خبریالانو ته ویلي چې د ټرمپ اداره په وروستیو ورځو کې له ایران سره د خبرو په بهیر کې ځینې پرمختګونه لیدلي دي. هغې زیاته کړې: «سټیو ویټکاف او جارد کوشنر به پاکستان ته ولاړ شي، څو د ایراني استازو نظرونه واوري او هیله لرو چې دا لیدنه مثبتې پایلې ولري او دواړه لوري پرمختګ ته ورسېږي.»
دا په داسې حال کې ده چې د ایران د بهرنیو چارو وزیر عباس عراقچي د جمعې په ماښام اسلاماباد ته رسېدلی او راپورونه وایي چې هغه به له پاکستان وروسته مسکو او مسقط ته هم سفرونه وکړي.
له بلې خوا، د ایران د بهرنیو چارو وزارت ویاند اسماعیل بقایي ویلي چې تر اوسه په پاکستان کې د امریکایي استازو سره د کومې رسمي ناستې پرېکړه نه ده شوې.
