بلوچستان: درې جلا جلا بریدونو کې یو پولیس سرتیری وژل شوی څلور نور ټپيان دي
د پاکستان د بلوچستان ایالت په بېلابېلو سیمو کې د وسلهوالو بریدونو په لړۍ کې یو پولیس سرتېری وژل شوی او لږ تر لږه څلور نور ټپیان شوي دي. .
ځايي چارواکي وایي، د جمعې په ماښام د بلوچستان د کچهي ولسوالۍ په مرکز کې ناپېژاندو وسلهوالو د پولیسو پر یوه تاڼه لاسي بمونه غورځولي او ډزې یې کړې دي، چې په پایله کې یو پولیس سرتېری وژل شوی او درې نور ټپیان شوي دي.
په یوه بله پېښه کې د بلوچستان د نوشکي ولسوالۍ په یوه پولیس تاڼه وسلهوالو برید کړی او ډزې یې کړې دي، چې له امله یو پولیس سرتېری ټپي شوی دی.
همداراز د ایالت په مرکزي ښار کوټه کې، د سپین کاریز په سیمه کې د د کان کیندنې پر یوه شرکت کمپ هم د برید هدف ګرځېدلی دی. د راپورونو له مخې، بریدګرو د کان کیندنې ماشینري او ځینې وسایطو اور ته اچولي دي.
تر اوسه هېڅ ډلې د دغو بریدونو مسوولیت نه دی منلی، خو په تېرو وختونو کې ورته پېښې د بلوڅ بېلتون غوښتونکو وسلهوالو ډلو پورې تړل شوې دي.
