پر اوکراین د روسیې په بریدونو کې ۷ کسان وژل شوي او لسګونه نور ټپيان شوي دي
پر اوکراین د روسیې د پراخو بریدونو په ترڅ کې لږ تر لږه ۷ کسان وژل شوي او لسګونه نور ټپیان شوي دي. اوکرایني چارواکو ویلي، روسیې په ننني (شنبه د غويي ۵مه) بریدونو کې پر اوکراین له ۶۶۰ څخه ډېر بېپیلوټه الوتکې او توغندي توغولي او د اوکراین سوېل ختیځ او څو نورې سیمې یې په نښه کړې دي.
په دې بریدونو کې د اوکراین د سوېل ختیځ په دنیپرو ښار کې د استوګنې د یوې ودانۍ لویه برخه نړېدلې ده. د دې سیمې والي ویلي، چې د څلورو کسانو مړي له کنډوالو را اېستل شوي دي.
د اوکرایني چارواکو په وینا، د ژغورنې د عملیاتو پر مهال پر همدې سیمې یو بل برید هم شوی چې له امله یې یو کس وژل شوی او اووه نور ټپیان شوي دي.
د راپورونو له مخې، په دې ښار کې د روسیې د بریدونو د ټپیانو شمېر له ۳۰ کسانو اوښتی دی. همدارنګه، د اوکراین په شمال کې د چرنیهیف پر سیمې د روسیې په یوه بل برید کې دوه کسان وژل شوي او ۷ نور ټپیان شوي دي.
د اوکراین ولسمشر ولادیمیر زېلېنسکي ویلي: «هر داسې برید باید زموږ شریکانو ته دا ور په یاد کړي چې اوسنی وضعیت بېړني او قاطع اقدام ته اړتیا لري او باید زموږ د هوايي دفاع سیستم ژر تر ژره پیاوړی شي».
