کابل کې د دودیزې غېږنيونې نړیواله جشنواره د ۷ هېوادونو د لوبغاړو په ګډون پای ته ورسېده
د طالبانو د المپیک، بدني روزنې او سپورټ ادارې د یوې خبرپاڼې لهمخې، د کابل ښار په ۲۵۰۰ کسیز جمنازيوم کې د دودیزې غېږنيونې نړیواله جشنواره د افغانستان په کوربتوب د شنبې په ورځ (د غويي ۵مه) پای ته ورسېده. دا جشنواره له تېرو درې ورځو راهیسې روانه وه.
د طالبانو د المپیک، بدني روزنې او سپورټ ادارې د شنبې په ورځ (د غويي ۵مه) د یوې خبرپاڼې په خپرولو سره ویلي، په دې جشنواره کې د ۷ هېوادونو ایران، قرغیزستان، تاجکستان، ازبکستان، ترکمنستان، ترکیې او افغانستان ۱۶۰ ورزشکارانو ګډون کړی وو.
د جشنوارې سیالۍ په درېیو برخو، کورش، رستمي غېږنيونه او کشتينګيري کې ترسره شوې. د هرې برخې لپاره ورزشکاران په بېلابېلو وزني کټګوریو کې سره سیالي وکړه.
د جشنوارې د پایلو لهمخې، په کورش برخه کې ازبکستان لومړی مقام، تاجکستان دويم او افغانستان درېيم مقام خپل کړ. په رستمي غېږنيونه کې افغانستان لومړی مقام، ازبکستان دويم او تاجکستان درېيم مقام وګاټه. همدارنګه، په کشتينګيري برخه کې تاجکستان لومړی مقام، ازبکستان دويم او افغانستان درېيم مقام خپل کړ.
د طالبانو د سپورټ ادارې ویلي، چې دا ډول نړیوالې سیالۍ د ورزشکارانو ترمنځ د ملګرتیا، د تجربو د تبادلې او د سیمهییزو همکاریو د پراخېدو لامل کېږي.
د یادونې وړ ده چې د سیالیو په پای کې غوره ورزشکارانو ته جایزې هم ورکړل شوې.
