د امریکا سرپرست لوی څارنوال: ټرمپ ښايي د سپینې ماڼۍ د مېلمستیا د ډزو اصلي هدف و
د امریکا سرپرست لوی څارنوال ټوډ بلانش د یکشنبې په ورځ وویل چې ډونالډ ټرمپ او د هغه د ادارې چارواکي ښايي د هغه شکمن کس هدف وو چې د سپینې ماڼۍ د خبریالانو د مېلمستیا پر مهال یې پر یو امنیتي مامور ډزې کړې وې.
بلانش وویل چې داسې ښکاري شکمن کس ښايي د ولسمشر په ګډون د ادارې پر کارکوونکو د برید نیت درلود. هغه زیاته کړه چې شکمن کس په احتمالي ډول له لاس انجلس نه د اورګاډي له لارې شیکاګو او بیا واشنګټن ته تللی و.
ټاکل شوې ده چې شکمن کس به د دوشنبې په ورځ په فدرالي محکمه کې پر فدرالي مامور د برید، د وسلې د کارولو او د فدرالي مامور د وژنې د هڅې په تورونو تورن شي.
هغه وویل چې تر اوسه معلومه نه ده چې دا پېښه له ایران سره کوم تړاو لري او که نه.
د راپورونو له مخې، شکمن کس د کالیفورنیا اوسېدونکی شاوخوا ۳۱ کلن سړی دی. د هغه د مخینې په اړه ډېر معلومات نه دي خپاره شوي، خو پر ټولنیزو شبکو پوسټونه ښيي چې ښايي ښوونکی و.
