پاکستاني رسنۍ: امنیتي ځواکونو په بلوچستان کې د «بي ایل ای» ۵ قومندانان وژلي
پاکستاني رسنیو راپور ورکړی، چې د پاکستان امنیتي ځواکونو د بلوچستان ايالت په نوشکي سیمه کې د پنځه وسله والو د وژلو ادعا کړې ده. امنیتي سرچینو رسنیو ته ویلي، چې د یادو عملیاتو په ترسره کولو سره یې د «بلوڅ بېلتون غوښتونکو» وسله والو د برید پلان شنډ کړی دی.
پاکستاني رسنۍ «جيو نيوز» د دوشنبې په ورځ د دغه هېواد امنيتي سرچینو له قوله خبر ورکړ، چې امنیتي ادارو معلومات ترلاسه کړي وو، چې د بلوچ بېلتون غوښتونکو ډلې وسله وال د بلوچستان په نوشکي سیمه کې د ترهګریز برید پلان لري. په همدې موخه امنیتي ځواکونو عملیات پیل کړل او د ترهګرو پر پټنځای یې برید وکړ.
د پاکستان امنيتي ځواکونه بلوڅ بېلتون غوښتونکې ډله د فتنۀ الهندوستان په نوم يادوي.
د خبر له مخې، د عملیاتو پر مهال د امنیتي ځواکونه او وسله والو ترمنځ نښته رامنځته شوي او په پایله کې د بلوڅ بېلتون غوښتونکو ۵ قومندانان ووژل شول، خو د وژل شویو وسله والو د هویتونو په اړه څه نه دي ویل شوي.
پاکستاني امنیتي ځواکونو ویلي چې د وسله والو پټنځای نړولی او ګڼ شمېر وسلې، راکټ لانچرونه، بمونه او مخابراتي وسایل یې نیولي دي.
د پاکستان امنيتي ځواکونه وخت په وخت د دغه ډول عملياتو او وسله والو وژلو ادعاوې کوي، د ازادو سرچينو له خوا یې تاييد نه کيږي.
