طالبان: په درې ولایتونو کې پنځه مېرمنې له تاوتریخوالي ژغورل شوي
د طالبانو د امر بالمعروف وزارت وایي، د غزني، بغلان او میدان وردګ ولایتونو کې یې پنځه مېرمنې له کورني تاوتریخوالي او نورو ستونزو ژغورلې دي.
د طالبانو د امر بالمعروف وزارت وایي، د غزني، بغلان او میدان وردګ ولایتونو کې یې پنځه مېرمنې له کورني تاوتریخوالي او نورو ستونزو ژغورلې دي.
دغه وزارت په یوه خبرپاڼه کې ویلي، د یادو ولایتونو محتسبینو د مېرمنو د حقونو د خوندي کولو په موخه دغه پنځه مېرمنې له بېلابېلو ستونزو ژغورلې دي.
د وزارت په وینا، په دغو قضیو کې د کورني تاوتریخوالي، کورني بند، نفقې او میراث اړوند ستونزې شاملې وې، چې مېرمنې ترې د ناوړه دودونو له امله محرومې شوې وې.
خبرپاڼه زیاتوي چې د تېرې حمل میاشتې په ترڅ کې په ټول هېواد کې د مېرمنو اړوند له ۴۰۱څخه ډېرو قضیو ته رسېدنه شوې، چې پکې د میراث، ولور، نفقې، کورني بند، په بدو کې ورکړې او غیر شرعي نکاح قضیې شاملې دي.
