د خيبرپښتونخوا د خزانې سلاکار مزمل اسلم ادعا کړې، چې په اسلاماباد او راولپنډۍ ښارونو کې، د ګرځبنديز له امله پاکستان ته هره ورځ شاوخوا ۱۹ بیلیونه او د لسو ورځو لپاره دا اقتصادي زیان ۱۹۰ بیلیونه پاکستاني کلدارو ته رسېږي.
مزمل اسلم د ايران او امريکې ترمنځ د خبرو لپاره د اسلام اباد او راولپنډۍ ښارونو کې ګرځبنديز پرځای کولو ته په غبرګون کې مرکزي حکومت ته وړاندیز کړی چې په دواړو ښارونو کې د فعالیتونو بنديز ته بیاکتنه وکړي او دا موضوع جدي ونیسي.
هغه زیاته کړه، چې اسلاماباد له تېرې یوې اوونۍ راهیسې، او لا هم تر دوو یا درېیو ورځو پورې، د ګرځبنديز په حالت کې دی. هغه وويل چې دا وضعیت له هغه وخته پیل شوی چې ايراني او امریکايي چارواکي د مذاکراتو لپاره اسلام اباد ته ورغلي وو.
هغه ټينګار کړی، چې دا حالت نه یوازې اقتصادي تاوانونه لري، بلکې د خلکو ورځنی ژوند هم اغېزمنوي. نوموړي خبرداری ورکړی چې د دغه حالت دوام به د پاکستان اقتصاد ته لا زيات زیان ورسوي.
د پاکستان پلازمېنه اسلام اباد کې په وروستيو ورځو کې د ايران او امریکا ترمنځ د خبرو اترو لپاره په يادو دواړو ښارونو کې رخصتي اعلان شوې، سړکونه تړل شوي او نزدې ټول ورځني فعاليتونه درول شوي وو.
