د وحدت ګوند مشر محمد محقق د پاکستان د پوځ د مشر له ستاینې او د ډیورند کرښې د رسمیت پېژندنې په تړاو له جنجالي څرګندونو وروسته اوس ویلي، که طالبان ایران هم د ځان مخالف کړي نو «رڼا ورځ به پرې توره شپه» شي.
محمد محقق د یکشنبې په ورځ (د غويي ۶مه) له یوې ایرانۍ رسنۍ سره په مرکه کې ویلي، طالبانو په دې سختو شرایطو کې له ایران څخه ملاتړ ونشو کړای، خو د ایران پر وړاندې هم دریځ نیونه به طالبانو ته ډېره درنه تمامه شي.
محقق زیاته کړې: «په دې مرحله کې به طالبان له ایران څخه ملاتړ ونهشي کړای او پر وړاندې یې هم نهشي درېدلی، ځکه دا ساده کار نهدی. پایلې لري، ژیوپولیتیکې پایلې لري».
محقق د افغانستان او ایران تر منځ ګډه پوله ۱۰۰ کیلومتره ګڼي، په داسې حال کې چې د دواړو هېوادونو تر منځ ګډه پوله څه باندې ۹۰۰ کیلومتره ده او ډیورند کرښه ۲۴۰۰ کیلومتره ګڼي، په داسې حال کې چې دغه کرښه څه باندې ۲۶۰۰ کیلومتره دی.
د نوموړي په وینا، افغانستان تر ډېره له پاکستان او ایران سره په کرښه او پولې وصل دی او اوس چې طالبان له پاکستان سره دښمني لري او که ایران هم د ځان مخالف کړي، نو پر طالبانو به رڼا ورځ توره شپه شي.
هغه ویلي: «که دوی [طالبان] د ایران پر وړاندې دریځ ونیسي او یا د امریکا په ګته کار وکړي، دې ته هم اندېښمن دي، چې پاکستان خو ورسره مخالف دی او که ایران هم مخالف شي بیا نو رڼا ورځ پرې توره شپه کېږي».
محقق باوري که طالبان د ایران پر وړاندې او د امریکا په ګټه کوم کار وکړي، نو ښايي «په پټه» یې داسې وکړي چې مقابل لوری «حساس» نهکړي.
د نوموړي دغه څرګندونې په داسې حال کې دي، چې د طالبانو او ایران تر منځ اړیکې د ډيپلوماټيکو او سفیرانو په کچه دي یعنې په کابل کې د ایران او په ایران کې د طالبان سفارتونه فعال دي او همداراز د دواړو هېوادونو تر منځ سوداګري په نورمال حالت کې روانه ده.
