افتخار حسین: د تحريک انصاف حکومت د ښاروالیو د ټاکنو په نه اعلانولو جمهوريت ته زيان رسوي

میا افتخار حسین د يکشنبې په ورځ يو بیان کې د تحریک انصاف په حکومت نيوکه وکړه، نااهله یې وباله، او زياته یې کړه، ياد حکومت له نويو ټاکنو تېښته کوي او د تېرو ټاکنو پر مهال یې د ښاروالۍ د نظام تر نامې لاندې له ولس سره درغلي کړې وه.
هغه تور لګولی، ايالتي واکمنه ګوند په تېرو ټاکنو کې د خپلې ناکامۍ وروسته، نور ټاکلي استازي له فنډونو او اختیاراتو بې برخې کړه.
نوموړي ادعا کړې، چې کله د ښاروالیو ټاکلو شویو استازو د خپلو قانوني حقونو لپاره لاريون وکړ، نو پر هغوی بدترین تشدد وشو.

میا افتخار حسین ټینګار کړی چې عوامي نیشنل ګوند تل د قوي، بااختیاره او خپلواکه محلي حکومتونو ملاتړ کړی دی.
هغه خپلو ګوندیانو ته سپارښتنه کړې چې د ټاکنو لپاره چمتووالی ونیسي، تنظیمونه فعاله کړي او د خلکو تر منځ د حقونو پوهاوی پراخ کړي.
پاکستان کې د ټاکنو د ۲۰۱۷ د قانون له مخې، خیبر پښتونخوا کې د ښاروالۍ د تېرو ټولټاکنو لومړی پړاو د ۲۰۲۱ کال د دسمبر په میاشت کې ترسره شوی و، چې د ټاکل شوو استازو څلور کلنه موده یې د ۲۰۲۶ کال د مارچ په ۱۵مه پای ته رسېدلې ده. د دویم پړاو استازو موده به د روان کال جون په ۳۰مه پای ته ورسېږي.
د قانون له مخې، د پاکستان د ټاکنو کمېسیون باید د محلي حکومتونو د مودې تر پای ته رسېدو وروسته په ۱۲۰ ورځو کې دننه نوې ټولټاکنې وکړي.