ایران د جیش العدل وسلهوالې ډلې سره تړلی یو کس اعدام کړی
د ایران قضايي چارواکي وایي، یو کس چې د «جیش العدل» په نوم د سني وسلهوالې ډلې له غړیتوب او پر امنیتي ځواکونو د بریدونو په ترسره کولو تورن و، اعدام شوی دی.
د تسنیم خبري اژانس د راپور له مخې، یاد کس چې عامر رامش په نوم یاد شوی، د ایران په جنوب ختیځ کې د ترهګرۍ ضد عملیاتو پر مهال نیول شوی و او وروسته پرې د وسلهوال بغاوت، بمي چاودنو او کمینونو په ګډون د ګڼو تورونو له مخې قضیه ثبت شوې وه.
ایراني چارواکي وایي، نوموړی د هغو بریدونو په ترسره کولو تورن و چې د پوځ او امنیتي ځواکونو پر موټرو او سرتېرو ترسره شوي وو.
جیش العدل،یوه افراطي سني وسلهواله ډله بلل کېږي چې د ایران په سیستان او بلوچستان ولایت کې فعالیت لري، او دغه سیمه د هېواد له تر ټولو بېوزلو سیمو څخه ګڼل کېږي.
