سهیل اپریدی: د عمران خان د خوشې کېدو لپاره له کشمیره د لاریونونو لړۍ پیل کوو
د پاکستان تحریک انصاف ګوند په یوه پراخه ولسي غونډه کې د خیبر پښتونخوا اعلی وزیر سهیل اپریدي ویلي، چې د ګوند بنسټګر او پخواني لومړي وزیر عمران خان د خوشې کېدو لپاره به خپل لاریونونه دوامداره کړي او دا لړۍ به له کشمیره پیل کړي.
د پاکستان تحریک انصاف له لوري د پاکستان تر ولکې لاندې کشمیر په پلازمېنه مظفراباد کې یوه پراخه ولسي غونډه ترسره شوې ده.
په دې غونډه کې د خیبر پښتونخوا اعلی وزیر سهېل اپرېدي ویلي، دوی به د ګوند د بنسټګر او پخواني لومړي وزیر عمران خان د خوشې کېدو لپاره خپلو احتجاجي لارو چارو ته دوام ورکړي او د دې لړۍ پیل به له کشمیره وکړي.
نوموړي زیاته کړې چې د عمران خان د خوشې کېدو لپاره یې ټولې قانوني، اساسي او ولسي لارې کارولې دي، خو تر اوسه کومه مثبته پایله نه ده ترلاسه شوې.
هغه ادعا کړې چې محکمې ورته د عمران خان سره د لیدنې اجازه ورکړې، خو د زندان مسوولین دا حکم نه عملي کوي او د محکمې پرېکړو ته غاړه نه ږدي.
