پېښور عالي محکمه: د جعلي افغان کډوالۍ کارت له کبله د شناختي کارت نه ورکول ناقانونه دي
د پېښور عالي محکمې د یوه پاکستاني وګړي د کمپیوټري پېژندپاڼې د ترلاسه کولو په قضیه کې د نادرا ادارې ته امر کړی چې نوموړي ته د ۹۰ ورځو په موده کې پېژندپاڼه ورکړي. دغه پاکستاني وګړي د مرستو ترلاسه کولو په موخه جعلي د افغان کډوالۍ کارت جوړ کړی و.
د خیبر پښتونخوا په پېښور کې عالي محکمې د حضرت رحمان په نوم د یوه پاکستاني وګړي د کمپیوټري پېژندپاڼې (شناختي کارت) د ترلاسه کولو په اړه پرېکړه کړې ده.
قضیه وروسته له هغه مطرح شوې چې حضرت رحمان د اقتصادي ستونزو له امله د افغان کډوالو لپاره د ۱۹۸۰ لسیزې د نړیوالو مرستو د ترلاسه کولو په موخه د افغان کډوالۍ د پېژند کارت (پي او آر کارت) جعلي نسخه جوړه کړې وه.
د نوموړي مدافع وکیلې ثناء ګلزار محکمې ته ویلي چې موکل یې اصلا پاکستاني تبعه دی، خو د بې وزلۍ له امله یې د لنډ مهال لپاره جعلي افغان کارت کارولی و، څو له مرستو برخمن شي. هغې زیاته کړې چې د همدې وجې له کبله د پاکستان د تابعیت ادارې (نادرا) نوموړي ته پېژندپاڼه نه ورکوله.
محکمې د دوسیې له اورېدو وروسته د مدافع وکیلې دلایل ومنل او د حضرت رحمان د حق په تایید یې حکم صادر کړ.
په پرېکړه کې محکمې د پاکستان د تابعیت ورکوونکې ادارې (نادرا) او نورو اړوندو ادارو ته لارښوونه کړې چې د ۹۰ ورځو په موده کې نوموړي ته د کمپیوټري پېژندپاڼې اجرا وکړي.
عدالت همداراز ویلي چې د جعلي افغان کارت جوړول د اقتصادي مجبوریو له امله ترسره شوي، خو اوس باید د قانون له مخې د هغه د تابعیت رسمي اسناد ورکړل شي.
