د طالبانو د پېښو پر وړاندې د مبارزې چمتوالي ادارې مشر، ملا نورالدین ترابي د کډوالۍ نړیوال سازمان(ای او ایم) له مشرې میا پارک او ورسره مل پلاوي سره لیدلي او د همکاریو پر پیاوړتیا یې خبرې اترې کړي دي.
له دغه ادارې څخه په خپره شوې خبرپاڼه کې راغلي، چې په یاده ناسته کې ملا ترابي د کډوالۍ نړیوال سازمان د رغنیزو، مخنیوي پروژو او بېړنیو مرستو په برخو کې یو مهم او اغېزمن شریک بللی. هغه همداراز د یادې ادارې لپاره د رضاکارانو د جذب روان بهیر ته اشاره وکړه او ویې ویل چې دا پروسه په چټکۍ سره روانه ده او ژر به بشپړه شي. نوموړي د دغو رضاکارانو پر ملاتړ ټینګار وکړ.
په خبرپاڼه کې د میا پارک له قوله ویل شوي، چې ای او ایم خپلو همکارانو ته لارښوونه کړې څو له دې ادارې سره فعاله او جدي همکاري وکړي.
اغلې پارک زیاته کړې، چې موخه یې دا ده چې د پېښو د مدیریت لپاره یو قوي او فعال میکانیزم رامنځته کړي، او په همدې خاطر د اړیکو مرکزونو پیاوړتیا او د رضاکارانو توانمندۍ ته ځانګړې پاملرنه کوي.
نوموړې همداراز وویل،چې په پکتیا ولایت کې پاتې نیمګړې پروژې بېرته پیل شوې دي او تمه ده په نږدې وخت کې بشپړې شي.
هغې ویلي،چې په کونړ ولایت کې د زلزله ځپلو خلکو لپاره د سرپناه جوړولو چارې روانې دي او هڅه کوي چې له تمویلونکو څخه د دې برخې لپاره نوره بودیجه هم ترلاسه کړي، ځکه زیانمن خلک جدي مرستو ته اړتیا لري.
