له عراقچي سره په لیدنه کې؛ پوتین له ایران سره د ستراتیژیکو اړیکو پر پیاوړتیا ټینګار کړی
د روسیې ولسمشر ولادیمیر پوتین له عباس عراقچي سره په لیدنه کې ویلي چې روسیه غواړي له ایران سره خپلې ستراتیژیکې اړیکې دوامدارې وساتي او لا یې پیاوړې کړي.
پوتین د سیمې وضعیت ته په اشارې ویلې چې روسیه چمتو ده د منځني ختیځ د سولې او ثبات لپاره هر ډول ډیپلوماټیکې هڅې وکړي او هیله یې وښوده چې په نږدې راتلونکي کې به سوله ټینګه شي.
له بلې خوا د ایران د بهرنیو چارو وزیر عباس عراقچي وویل چې د ایران او روسیې اړیکې یو ستراتیژیک شراکت جوړوي چې دا به دوام وکړي او لا به هم پیاوړې شي.
د راپورونو له مخې، ایران او روسیې تېر کال د ۲۰ کلنې ستراتیژیکې همکارۍ تړون لاسلیک کړی او دواړه هېوادونه د انرژۍ، دفاع او سیمهییز سیاست په برخو کې پراخې ګډې ګټې لري.
دغه لیدنه په داسې وخت کې شوې چې په منځني ختیځ کې د تاوتریخوالي او نړیوالو فشارونو کچه لوړه شوې او مسکو هڅه کوي د ډیپلوماسۍ له لارې د کړکېچ د کمېدو لپاره مثبت رول ولوبوي.
