په جنوبي سوډان کې د کوچنۍ مسافر وړونکې الوتکې د لوېدو پېښه کې ۱۵ کسان وژل شوي
د جنوبي سوډان په هوايي فضا کې د یوې کوچنۍ مسافر وړونکې الوتکې د لوېدو له امله ۱۵ کسان وژل شوي دي.
د بيبيسي انګلیسي د راپور له مخې، دغه الوتکه د دوشنبې په سهار د پلازمېنې جوبا په لور روانه وه، خو د الوتنې شاوخوا ۳۰دقیقې وروسته یې د هوايي ترافیک له کنټرول سره اړیکه پرې شوه.
د جنوبي سوډان د ملکي هوايي چلند ادارې ویلي، چې د پېښې د علت معلومولو لپاره پلټنې پیل شوې دي.
لومړني راپورونه ښيي، چې ښايي الوتکه د خرابو هوايي شرایطو، په ځانګړي ډول د لید د سخت کمښت له امله غورځېدلې وي.
د مسافرو د نوملړ له مخې، په دې الوتکه کې ۱۵ کسان سپاره وو، چې پکې یو پیلوټ او ۱۴مسافر شامل وو. له دې ډلې ۱۳کسان د جنوبي سوډان او دوه نور د کینیا وګړي وو.
جنوبي سوډان په وروستیو کلونو کې د هوايي چلند پېښو له ګڼو ستونزو سره مخامخ شوی، او د دغه هېواد د الوتنو د خوندیتوب په اړه اندېښنې لا هم دوام لري.
