د طالبانو د چارو ادارې مشر نورالحق انور د یتیمتاق د سمنټو فابریکې د پرانیستې په مراسمو کې ادعا کړې، چې اوس د دوی مخالفین د ګوتو په شمېر پاتې دي. د نوموړي په وینا؛ د هغوی موخه واک ته رسېدل دي، څو د بهرنیانو له لارښوونو سره سم عمل وکړي.
هغه ویلي:« د دغه کسانو غوښتنې د ولس له ارادې سره تړاو نهلري؛ بلکې غواړي خپل شخصي اهداف عملي کړي او حتی له ځان وروسته خپل اولادونه واک ته ورسوي». هغه زیاته کړې، واک ته د طالبانو له رسېدو وروسته د افغانانو ترمنځ یووالی او پیوستون رامنځته شوی دی.
د هغه په وینا؛ دوی هغه ټولې لارې تړلې دي، چې د نفرت او کرکې لامل کېدې. انور همداراز ویلي، چې د طالبانو د مشر ملاهبتالله اخوندزاده د فرمان له مخې ټولو هغو کسانو ته عمومي عفو اعلان شوې چې له دې مخکې یې جرمونه ترسره کړي وو. هغه وایي، چې تراوسه هم پر دغه فرمان عمل کېږي.
هغه ټینګار کړی، چې طالبان هڅه کوي د تېرو شلو کلونو پاتې ستونزې او شاتهوالی لهمنځه یوسي. دا په داسې حال کې ده، چې تر دې وړاندې د طالبانو د بهرنیو چارو او د قومونو او قبایلو وزیرانو هم ورته ادعاوې کړې وې او ویلي یې و، چې په افغانستان کې د دوی مخالفې جبهې او ډلې هیڅ فعالیت او حضور نهلري.
