د طالبانو د ویاند مرستیال حمدالله فطرت وایي، د پاکستاني پوځ له لوري د کونړ ولایت پر مرکز اسعداباد او ځینو ولسوالیو په تازه بریدونو کې ملکي تلفات اوښتي، چې پکې ۴ تنه وژل شوي او ۷۰ نور ټپیان شوي دي. هغه ویلي، طالبان دا بریدونه غندي او یو «نهبخښل کېدونکی جنګي جنایت» یې بولي.
حمدالله فطرت په خپل ایکس پیغام کې ویلي چې نن یو ځل بیا د پاکستاني فوځي رژیم له لوري د کونړ ولایت مرکز اسعداباد او د مرورې ولسوالۍ بېلابېلې سیمې په هاوانونو او توغندیو ویشتل شوي دي.
هغه ویلي، چې دغه بریدونه د ماسپښین شاوخوا دوه بجې پیل شوي او د سید جمالالدین افغان پوهنتون په ګډون د عامو خلکو کورونه هم پکې په نښه شوي دي.
فطرت زیاته کړې چې په دې بریدونو کې ۳۰ محصلین او ټول ۷۰ تنه عام وګړي، چې ښځې او ماشومان هم پکې شامل دي، ټپیان شوي دي. د هغه په وینا، څلور تنه نور وژل شوي دي.
هغه دغه بریدونه په سختو ټکو غندلي او ویلي یې دي چې دا د پاکستاني فوځي رژیم له لوري «نه بخښل کېدونکی جنګي جنایت، وحشت او پاروونکی عمل» دی، ځکه چې په وینا یې پکې ملکي وګړي، علمي او تحصیلي بنسټونه هدف ګرځول شوي دي.
