په کابل کې د بېسرپرستو ښځو د تولیداتو پنځه ورځنی نندارتون پرانیستل شو
په کابل کې د افغاني سره میاشت ټولنې په مرکزي مرستون کې د بېسرپرستو ښځو او اړمنو کورنیو د تولیداتو پنځه ورځنی نندارتون پرانیستل شو. په دې مراسمو کې د یادې ادارې مشر شهاب الدین دلاور، د ملي او نړیوالو بنسټونو استازو او یو شمېر کورنیو ګډون درلود.
د طالبانو په ولکه کې د افغاني سره میاشت تولنې مشر، شهابالدین دلاور، د نندارتون د پرانیستې پر مهال وویل، چې دا نندارتون د ټولنې د یوه محروم قشر د اقتصادي فعالیتونو کې د ونډې څرګندونه کوي. د هغه په وینا، سره میاشت د بېسرپرستو او کونډو ښځو لپاره سرپناه، د زدهکړې زمینه او مسلکي مهارتونو د زده کړې اسانتیاوې برابرې کړې دي.
هغه زیاته کړه، چې دا ښځې تر درې کلونو پورې په مرستونونو کې تر ملاتړ لاندې وي او د زدهکړو ترڅنګ نغدي مرستې او نور امکانات هم ترلاسه کوي.
دلاور همداراز ټینګار وکړ، چې د دې ادارې په رهبرۍ کې پرېکړه شوې، څو د ښځو د تولیداتو لپاره یو ځانګړی بازار جوړ شي، تر څو د لاسي صنایعو د ودې او د ښځو د کارموندنې زمینه برابره شي.
بل لور ته، د«ای ایف ار سي» مرستیالې هما نادري وویل، چې په تېرو څلورو کلونو کې د بېسرپرستو ښځو د ملاتړ لپاره پراخې هڅې شوې دي او مرستونونه د بشري مرستو د وړاندې کولو په برخه کې مهم رول لري.
د هغې په خبره، دا مرکزونه اوس د درې کلونو لپاره د موقتي سرپناه په توګه کارول کېږي او ښځو ته د خیاطۍ، حکاکۍ، قالینبافۍ، ګلدوزۍ او نورو مسلکي مهارتونو د زده کړې زمینه برابروي.
د یادونې وړ ده، چې دا پنځه ورځنی نندارتون د افغاني سره میاشتې ټولنېله لوري په کابل کې د دې ادارې په مرکزي مرستون کې جوړ شوی او موخه یې د بېسرپرستو ښځو د تولیداتو بازارموندنه او له اړمنو کورنیو ملاتړ ښودل شوې ده.
