د شانګهای همکارۍ سازمان د دفاع وزیرانو غونډه په بېشکک کې ترسره شوه
د پاکستان دفاع وزیر خواجه اصف د قرغزستان په بېشکک ښار کې د شانګهای همکارۍ سازمان د دفاع وزیرانو غونډې په څنډه کې د ایران، چین، قزاقستان او تاجکستان له لوړپوړو دفاعي چارواکو سره لیدلي دي. په یاده غونډه کې د غړو هېوادونو د دفاع وزیران د سیمې امنیت او دفاعي موضوعاتو په اړه خبرې کوي.
د نړۍوالې سولې، د ترهګرۍ پر ضد مبارزې او د غړو هېوادونو ترمنځ د دفاعي او پوځي همکاریو موضوعات د یادې غونډې د اجنډا مهمې برخې دي. د روان کال د شانګهای د همکارۍ سازمان غونډه په داسې حال کې ترسره کېږي، چې په لوېدیځه اسیا او منځني ختیځ کې کړکېچونو نړۍوال وضعیت ترینګلی کړی دی.
دغه سازمان چې د سیمې له لویو سیاسي او اقتصادي بنسټونو څخه ګڼل کېږي، ښايي د دغه شخړو د اغېزو کمولو لپاره پر لارو چارو هم بحث وکړي. د شانګهای همکارۍ سازمان یو سیمهییز سازمان دی، چې د مرکزي اسیا هېوادونه چین، روسیه، پاکستان، هند او ایران پهکې شامل دي او د امنیتي، اقتصادي او سیاسي همکاریو د پیاوړتیا په موخه جوړ شوی دی.
