د افغانستان د بدن جوړونې فدراسیون خبر ورکړی، چې د یادې برخې پخوانی اتل سیدهاشم موسوي د امریکا د «امیرلنډ کاپ» سیالیو کې د نارینهو د بدن ښکلا په کټګورۍ کې اتلولي خپله کړې ده. دغه ورزشکار له کلونو ځنډ وروسته د بدن جوړونې اتلولۍ سیالیو ته راستون شوی.
د فدراسیون د اعلان له مخې؛ موسوي پخوا په ۲۰۱۷ او ۲۰۲۲کلونو کې په اسیا او نړۍوالو سیالیو کې مډالونه ګټلي وو او په نړۍواله کچه یو پیاوړی ریکارډ لري. دغه افغان ورزشکار چې له څلورو کلونو راهیسې په امریکا کې ژوند کوي، د سیالۍ ډګرونو څخه د یوې مودې لرې کېدو وروسته بېرته لوبغالي ته راستون شوی او له بریالي فعالیت سره یې د اتلولۍ لقب ګټلی دی.
دغه لاسته راوړنه د موسوي لپاره یو پیاوړی بېرته راتګ دی او د مسلکي سیالۍ په کچه د هغه د چمتووالي او وړتیا لوړه کچه ښیي.
