د سرپل یو شمېر اوسېدونکو افغانستان انټرنشنل ته ویډیوګانې او انځورونه را استولي او وايي، د دغه ولایت په مرکزي زندان کې له بندیانو سره ناوړه او «غیراخلاقي» چلند کېږي. دغو کسانو د زندان مدیر تورن کړی، چې له ښځینه بندیانو ویډیوګانې اخلي او بندیان په بېلابېلو پلمو ګواښي.
شکایت کوونکو د ځینو ویډیوګانو او انځورونو په رالیږلو سره ادعا کړې چې د سرپل زندان عمومي مدیر مولوي سید ناصر جابر له شتمنو بندیانو نه باج اخلي او ښځینه زندانیانې په ویډیوګانو ګواښي.
ددوی په وینا، څو ورځې وړاندې مولوي سید ناصر جابر پر یوه ځوان زنداني تشدد کړی و او بیا یاد ځوان ځانوژنه وکړه.
ددغه ځوان د ځانوژنې خبر په مستقل ډول نه دی تایید شوی.
همدا راز دوی ادعا کوي چې جابر له بندیانو، په ځانګړي ډول له هغو کسانو چې مالي توان لري، باج اخلي او له بېوسه بندیانو سره ظالمانه چلند کوي.
د یادونې وړ ده چې دغه ادعاوې په خپلواکه توګه نه دي تایید شوی او یوازې د سرپل د څو اوسېدونکو روایت دی.
