د ملګرو ملتونو د سرمنشي ویاند اسټفان دوجاریک وايي، چې د ځایي روغتیايي چارواکو د معلوماتو له مخې، د پاکستان له لوري د کنړ ولایت په اسعداباد کې د شویو بریدونو له امله لږ تر لږه اووه تنه وژل شوي او ۷۹نور، چې ډېری یې ماشومان دي، ټپیان شوي دي.
دوجاریک د سهشنبې په ورځ (غویي ۸مه) په یوه خبري ناسته کې خبرداری ورکړی، چې د جګړو دوام به زیانمنې ټولنې لا ډېرې له ګواښونو سره مخ کړي او د ملکي وګړو کړاوونه به زیات کړي.
هغه زیاته کړه، چې دغو بریدونو د یوه پوهنتون د محصلینو د لیلیې یوه برخه، د تېلو یو مرکز او د معتادینو د درملنې یو مرکز هم زیانمن کړی دی.
د ملګرو ملتونو د معلوماتو له مخې، د پاکستان او طالبانو ترمنځ د وروستیو کړکېچونو له امله په افغانستان کې له سلو زرو ډېر کسان بېځایه شوي دي.
د ملګري ملتونه ویاند له افغان طالبانو او پاکستان څخه غوښتي، چې د نړیوال بشردوستانه قوانینو درناوی وکړي او د ملکي وګړو خوندیتوب ته لومړیتوب ورکړي.
تر دې مخکې، د په افغانستان کې د ملګرو ملتونو د مرستندویه ماموریت هم پرته له دې چې پاکستان په ښکاره نوم واخلي، د دوشنبې ماښام په اسعداباد کې د بریدونو له امله د لسګونو کسانو د مرګژوبلې پخلی کړی و.
خو له بلې خوا، پاکستان د طالبانو هغه ادعاوې رد کړې دي چې ګواکې ملکي وګړي یې په نښه کړي دي، او دا یې «روښانه دروغ» بللي دي. اسلاماباد وايي، افغان طالبان د حقایقو په تحریفولو سره هڅه کوي د خلکو خواخوږي ترلاسه کړي او د تحریک طالبان پاکستان ملاتړ پټ کړي.
