د پاکستان په سند ایالت کې پر علي وزیر «د وسلې لېږد او غلا» نوې قضیه ثبت شوې
پاکستاني پولیسو د پښتون ژغورنې غورځنګ پر مخکښ غړي علي وزير «د وسلې لېږد او غلا» قضیه ثبت کړې ده. د علي وزیر وکیل امداد حیدر سولنګي په دې اړه ويلي، چې د سند ایالت په شکاپور ولسوالۍ کې پر نوموړي «د وسلې لېږد او غلا» تورونه ناسم دي او دغه قضیه د دولتي ادارو په غوښتنه ثبت شوې ده.
د یادونې وړ ده، چې علي وزیر تر سخت څار لاندې د سند د دادو ولسوالۍ محکمې قاضي ته یووړل شو؛ خو د قاضي د رخصت له امله د یادو تورونو په اړه د قضیې اورېدنه د مئ تر ۵مې نېټې وځنډېده.
علي وزیر د مارچ له ۱۶مې راهیسې په زندان کې دی او وکیل یې دغه پرلهپسې قضیې د قانون حاکمیت ته زیان بولي.
تر دې وړاندې د بښنې نړۍوال سازمان د علي وزیر پر خپلسرې او دوامداره زنداني کېدو اندېښنه ښودلې وه او د پاکستان له حکومته یې غوښتنه کړې وه، چې نوموړی سملاسي خوشې کړي. علي وزیر (د مارچ میاشتې پر ۱۶مه) نېټه په حیدراباد کې وروسته له هغه بېاځلي ونیول شو، چې د سند سترې محکمې یې په یوه بله قضیه کې د خوشې کېدو حکم کړی و.
