پوتين له ټرمپ سره په خبرو کې د ايران د اټومي ستونزې د حل لپاره وړانديزونه کړي

د پنټاګون د مالي چارو سرپرست جولس هرسټ، د چارشنبې په ورځ د امریکا د ولسي جرګې د وسله‌والو خدمتونو کمېټې ته وویل، چې د دې پیسو ډېره برخه پر وسلو او مهماتو لګول شوې ده.

نوموړي دا روښانه نه کړه چې په دغه اټکل کې د منځني ختیځ په پوځي اډو کې د جګړې له امله د زیانمنو شویو تاسیساتو د بیا رغونې او ترمیم لګښتونه هم شامل دي که نه.

د دې کمېټې مخکښ ډیموکرات غړي اډم سمیت د هرسټ له ځواب وروسته وویل، دوی له ډېرې مودې راهیسې د دې جګړې د لګښت په اړه پوښتنې کولې، خو تر اوسه ورته کره څه نه وو ویل شوي.

امریکا د فېبرورۍ پر ۲۸مه پر ایران بریدونه پیل کړل او اوس دواړه لوري یو نازک اوربند ساتي.

د هند پوډوچیري فډرالي سیمې په ګډون په څلورو ایالتونو، اسام، لویدیځ بنګال، کیراله او تامیل ناډو کې د نویو حکومتونو د ټاکلو لپاره د چارشنبې په ورځ د رایي اچونې پروسه پای ته ورسېده.

د نظر پوښتنو د ارزونې له‌مخې، د هند د لومړي وزیر نریندرا مودي په مشرۍ د «بهارت جنتا » ګوند په دوو مهمو ایالتونو کې په اسانۍ سره د اکثریت په ترلاسه کولو درېیم ځل واک ته د رسېدو په حال کې دی.

د راپورونو له‌مخې، په لویدیځ بنګال کې د مودي ګوند د ګانګرس ګوند ته ماتې ورکړي، په تامیل ناډو کې واکمن ډي‌ایم‌کې ګوند په دویم ځل مخکښ ښودل شوی او کیراله کې د هند کمونېست ګوند په یوې سختې سیالۍ کې د ګانګرس ګوند په مشرۍ ایتلاف ته د ماتې ورکولو په حال کې ښکاري.

د دغو ټاکنو رسمي پایلې به د می میاشت په ۴مه نېټه اعلان شي.

دونالد ټرمپ پر خپله ټولنیزه پاڼه لیکلي:“ایران باید ژر هوښیار شي” دغه هېواد “نه پوهېږي څنګه غیراټومي تړون لاسلیک کړي.”

رویټرز لیکلې د سپینې ماڼۍ یو چارواکي ویلي، ټرمپ دامریکا نفتي شرکتونو سره د احتمالي بندیزونو د اغېزو د کمولو په اړه خبرې کړې دي، چې که وضعیت میاشتې هم وغځېږي، د تیلو نړیوال بازارونه به تر ډېره اغېزمن نه شي.

راپورونه وايي چې امریکا هڅه کوي د ایران د نفتو صادرات د سمندري بندیز له لارې محدود کړي او تهران دې ته اړ کړي چې د هرمز تنګي له لارې د تګ راتګ محدودیتونه ومني.

له بلې خوا، ایران خبرداری ورکړی چې که بندیزونه دوام وکړي نو “بې‌ساري پوځي اقدامات” به وکړي او د هرمز تنګي له لارې د تګ راتګ د ګډوډولو احتمال شته.

د یاد هېواد د بهرنیو چارو وزارت ویاند د خپلې اونیزې خبرې غوڼدې پرمهال ویلي، چې د منځني ختیځ کړکېچ د سون توکو پر نړیوالو سرچینو فشار زیات کړی دی.

لن جیان وویل:«تر هغه چې په سیمه کې بشپړ اوربند ونه شي او د نورو کړکېچونو مخه ونه نیول شي، د انرژۍ نړیوال امنیت به له جدي ګواښونو سره مخ وي».

د چین د بهرنیو چارو وزارت د انرژۍ نړیوال امنیت خوندیتوب او د صنعتي تولید او اکمالاتو لړۍ د ټیکاو په اړه یو ځل بیا له ټولو اړخونو سره د کار د دوام په اړه ډاډ ورکړی دی.

شریف په اسلام‌اباد کې د پاکستان د فدرالي کابینې غونډې ته د وینا پر مهال وویل، چې د سیمې د سولې لپاره له اسلام اباد نه «پوره او مخلصانه هڅې» وشوې.

د ده په وینا، په دغو هڅو کې د پاکستان لوی درستیز عاصم منیر، د بهرنیو چارو وزیر اسحاق ډار او نورو مهمو کسانو فعاله ونډه واخیسته.

شریف ټینګار کړی، چې د همدې هڅو پایله هغه اوربند دی چې د امریکا او د اسلامي جمهوریت ترمنځ تمدید شوی او دوام لري.

شریف زیاته کړې چې د ایران د بهرنیو چارو وزیر عباس عراقچي د خبرو د دویم پړاو لپاره له خپل پلاوي سره اسلام‌اباد ته ورغلی و او له پاکستاني لوري سره یې مهمې لیدنې کړې دي.

د هغه په وینا، روسیې ته تر سفر وړاندې له عراقچي سره په ټیلیفون غږیدلی او ډاډ یې ورکړی، چې له خپلې مشرتابه سره تر سلا وروسته به ژر مثبت ځواب وړاندې کړي.

د پاکستان د منځګړتوب هڅې تېره اونۍ وروسته له هغه ناکامې شوې، چې ټرمپ اسلام اباد ته د خپل پلاوي له استولو ډډه وکړه او ویې ویل، چې که تهران خبرې اترې غواړي، دوی ته دې زنګ ووهي.

د پاکستان لومړي وزیر دغه راز ویلي، چې د ایران-امریکا جګړې د پاکستان د تېرو دوو کلونو ګډو هڅو ته زیان اړولی او په وینا یې، په نړیوالو بازارونو کې د نفتو د بیو لوړېدو غیرمعمولي وضعیت رامنځته کړی دی. د ده په وینا، په نړیوال بازار کې د بیو د لوړېدو له امله د پاکستان د اقتصادي ثبات هڅې هم اغیزمنې شوې دي.