سرچینو افغانستان انټرنشنل ته ویلي، چې په استانبول ښار کې د طالبانو ادارې او د پاکستان حکومت ته د نږدې استازو غیررسمي خبرې کیږي، څو د دواړو لوریو ترمنځ د شخړو حل لارې و ارزوي. سرچینې زیاتوي چې دا ناسته د طالبانو ادارې او د پاکستان حکومت په تایید او د ترکیې په ملاتړ کېږي.
د سرچینو په وینا، د افغانستان له لوري د طالبانو تر کنټرول لاندې پلاوي کې جعفر مهدوي، عاطف مشعل، غنچهګل ارمان، عبیدالله بهیر او سلیمان بنشاه ګډون لري.
له بلې خوا په دغو خبرو کې د پاکستان له اړخه مشاهد حسین، ستاره ایاز، اصف درانی، سناتور عبدالقدیر خان او حامد میر برخه اخلي.
سرچینې وایي، د خبرو په اجنډا کې د تحریک طالبان پاکستان فعالیتونه او داعش، پر ډیورنډ کرښه نښتې او د پاکستان بریدونه، اقتصادي وضعیت او د کډوالۍ اړوند مسالې شاملې دي.
د سرچینو په وینا، د دې ناستې هدف د تاوتریخوالي د کمولو لپاره لاره برابرول او د سرحدي او امنیتي کړکېچونو د مدیریت عملي لارې لټول دي.
همدارنګه په وړاندیزونو کې د امنیتي معلوماتو تبادله، د ډیورند کرښې په اوږدو کې د تاوتریخوالي د مخنیوي میکانیزمونه او د دواړو هېوادونو ترمنځ د وګړو او سوداګرو د تګ راتګ اسانتیاوې شاملې دي.
سرچینې زیاتوي چې له دې وړاندې جعفر مهدوي له یو شمېر افغان سیاسي څېرو سره هېواد ته د ستنېدو په اړه خبرې کړې وې. اوس دا خبرې د طالبانو او پاکستان په تایید، خو د ترکیې په ډیپلوماټیک منځګړیتوب د یوه غیررسمي بهیر په اډانه کې روانې دي.
تر اوسه دغو نوماندو کسانو په وروستیو ۲۴ ساعتونو کې د استانبول د دې ناستې په اړه جزئیات نه دي وړاندې او داسې تازه راپور هم نه دی ترلاسه شوی چې په مستقیم ډول د دغو خبرو جزئیات تایید یا بشپړ کړي.
