سېنټکام: د «جیرالډ ار فورډ» الوتکه وړونکې بېړۍ په سره سمندر کې خپلو عملیاتو ته دوام ورکوي
د امریکا مرکزي قوماندانۍ پر اېکس پاڼه د «جیرالډ ار.فورډ» الوتکه وړونکې بېړۍ انځورونو په خپرولو سره لیکلي، چې دغه بېړۍ په سره سمندر کې خپلو عملیاتو ته دوام ورکوي. د رسمي اعلان له مخې؛ دغه بېړۍ په سره سمندر کې د الوتنې ماموریتونه ترسره کوي.
خو د چهارشنبې په ورځ راپورونه هم خپاره شول، چې ښيي جیرالډ ار فورډ به د امریکا سواحلو ته بېرته راستنه شي. دغه پرمختګونه داسې مهال رامنځته کېږي، چې په سیمه کې د روانو کړکېچونو له امله د امریکا پوځي حضور پراخ شوی او د الوتکه وړونکو بېړیو ځای پرځای کول کولای شي په منځني ختیځ کې د واشنګټن د سمندري ځواکونو په ځای پرځای کولو اغېزه وکړي.
