کونړ کې له تېرې ورځې راهیسې د پاکستان په بریدونو کې یو ملکي وګړی وژل شوی او ۳ نور ټپیان دي
د طالبانو اړوندو رسنیو راپور ورکړی، چې له تېر مازېګر راهيسې پاکستاني ځواکونو د کونړ ولايت پر دانګام ولسوالۍ بريدونه پيل کړي چې ګڼې مرمۍ د ملکي خلکو پر کورونو لګېدلې دي. د راپور له مخې؛ په دغه بریدونو کې یو ملکي وګړی وژل شوی او ۳ نور ټپیان دي.
دا په داسې حال کې ده، چې له تېرو څو ورځو راهیسې په پرلهپسې ډول پاکستاني ځواکونو د کونړ په مرکز اسعداباد او یو شمېر نورو ولسوالیو بریدونو ته زور ورکړی، چې له کبله یې لسګونه کسانو ته مرګ ژوبله اوښتې ده.
تازه د ملګرو ملتونو د سرمنشي ویاند سټیفن دوجارېک وايي، چې د ځایي روغتیايي چارواکو د معلوماتو له مخې د پاکستان له لوري د کونړ ولایت پر اسعداباد د شویو بریدونو له امله لږترلږه اووه کسان وژل شوي او ۷۹نور چې ډېری یې ماشومان دي؛ ټپیان شوي دي.
دوجارېک د سېشنبې په ورځ (د غویي ۸مه) په یوې خبري ناسته کې خبرداری ورکړی، چې د جګړو دوام به زیانمنې ټولنې لا ډېرې له ګواښونو سره مخ کړي او د ملکي وګړو کړاوونه به لا پراخ کړي.
د ملګرو ملتونو د معلوماتو له مخې؛ د پاکستان او طالبانو ترمنځ د وروستیو کړکېچونو له امله په افغانستان کې له ۱۰۰زرو ډېر کسان بېځایه شوي دي.
