د بښنې نړۍوال سازمان د حنیف پښتین او نورالله ترین د سملاسي خوشې کېدو غوښتنه کړې
د بښنې نړۍوال سازمان د پښتون ژغورنې غورځنګ د دوو مخکښو غړو حنیف پښتین او نورالله ترین جبري بېدرکه کېدو په اړه اندېښنه څرګنده کړې او د خیبر بښتونخوا له سر وزیر سهیل اپریدي یې غوښتي، چې حنیف پښتین او نورالله ترین سملاسي خوشې کړي.
یاد سازمان ويلي، دغه کسان تېرکال (د نومبر په ۱۲مه) هغه مهال د پولیسو له لوري ونیول شول چې په پېښور کې یې د ځایي حکومت لهخوا په یوې بلل شوې جرګه کې تر ګډون ورورسته د خیبرپښتونخوا له اسمبلۍ ووتل.
دغه سازمان زیاته کړې، چې د یادې جرګې پرمهال حنیف پښتین او نورالله ترین ته د نظر وړاندې کولو اجازه هم ورنه کړل شوه. یاد سازمان پر اېکس پاڼه کاږلي، چې له حنیف پښتین او نورالله ترین سره نیول شوي پنځه نور فعالان د روان ۲۰۲۶کال (د جنورۍ په ۱۸مه) د پنجاب له اټک زندان څخه خوشې شوي؛ خو حنیف پښتین او نورالله ترین لاهم په جبري توګه بېدرکه دي او تراوسه يې د اوسېدو ځای نهدی روښانه شوی او نه يې هم کورنیو ته په دې اړه معلومات ورکړل شوي.
د بښنې نړۍوال سازمان دغه کړنه د عادلانه محاکمې له حقونو ښکاره سرغړونه وبلله. یاد سازمان د خیبر پښتونخوا له سر وزیر سهیل اپریدي غوښتي، چې د حنیف پښتین او نورالله ترین د اوسېدو ځای په اړه معلومات سملاسي د دوی له کورنیو سره شریک کړي او دوی دې سملاسي خوشې کړي.
