د فوټبال نړۍوال فدراسیون (فیفا) لهخوا نړۍوالو سیالیو ته د افغان ښځینهو فوټبال لوبډلې د بېرته ستنېدو وروستۍ پرېکړې سره هممهاله، ورزشي شخصیتونو او په دې برخه کې ګڼو فعالینو دغه اقدام د مقاومت او په نړۍواله کچه د افغان مېرمنو د غږونو منعکس کولو لپاره یو مهم ګام بللی دی.
د افغانستان د ښځینهو فوټبال ملي لوبډلې پخوانۍ لوبډلمشره او بنسټ اېښودونکې خالده پوپل ویلي، چې دغه لوبډله کولای شي په نړۍوال سټېج کې د هغو ښځو لپاره چې په کور دننه له پراخو محدودیتونو سره مخ دي؛ د «مبارزې او مقاومت» سمبول شي.
د افغانستان د ښځینهو فوټبال ملي لوبډلې په ۲۰۲۱کال کې واک ته د طالبانو له رسېدو راهیسې کومه رسمي نړۍواله لوبه نهده کړې. د زدهکړو، کار او ورزش په برخو کې پر ښځو او نجونو سخت محدودیتونه د دې لامل شوي، چې ګڼ شمېر ښځینه ورزشکاران یا جلاوطنه شي او یا خپل سپورتي فعالیتونه ودروي.
د اغلې پوپل په وینا؛ په ۲۰۲۱کال کې تر سیاسي بدلونونو وړاندې شاوخوا ۲۵ ښځینه لوبغاړو په رسمي ډول د افغانستان له ملي لوبډلې سره قراردادونه درلودل، چې ډېری یې اوس د اسټرالیا په ګډون په بېلابېلو هېوادونو کې ژوند کوي.
هغې ټینګار کړی: «زموږ لوبډله تل د ښځو د حقونو د فعالې او مدافع په توګه پېژندل شوې ده. اوس د فیفا له ملاتړ سره دغه فرصت برابر شوی، چې په بهر کې ځوان استعدادونه وده وکړي او په افغانستان کې ښځو ته د هیلو ډک پیغام ورسوي».
دغه لوبډله چې د «متحده افغان مېرمنو» په نوم فعالیت کوي، اوسمهال د لوبغاړو پر غوراوي بوخته ده او په دې برخه کې فیفا په انګلستان او اسټرالیا کې سیمهییز انتخابي کمپونه ترسره کړي دي.
ټاکل شوې، چې یاده لوبډله به د جون په میاشت کې بېرته لوبو ته ستنه شي؛ خو د لوبې، سیالانو او ځای په اړه یې جزییات لا نهدي اعلان شوي. له دغه پرمختګ سره د افغانستان د ښځینهو فوټبال لوبډله به د برازیل په ۲۰۲۷کال کې د ښځو د نړۍوال جام په کوالیفای سیالیو کې ګډون ونه کړي؛ خو د ۲۰۲۸کال د لاس انجلس اولمپیک لوبو لپاره د کوالیفای سیالیو کې د ګډون چانس لري.
ورته مهال د سپورت او حقونو ټلوالې اجرایوي مشرې اندریا فلورنس د فیفا پرېکړه د سپورت څخه هاخوا وبلله او ویې ویل، چې دغه اقدام د بشري حقونو او جنسیتي برابریو په اړه یو مهم پیغام ورساوه. هغې ټینګار وکړ: «هیڅ حکومت باید دا واک ونهلري، چې ښځې له عامه ژوند څخه حذف کړي».
