د جګړې اقتصادي اغېز؛ شهباز شریف ویلي د پاکستان د تېلو اونیز لګښت ۸۰۰ مېلیون ډالرو ته ورسېد
د پاکستان لومړي وزیر شهباز شریف د چهارشنبې په ورځ د فدرالي کابینې غونډې ته ویلي، چې د منځني ختیځ جګړې له کبله د سون توکو نړۍوالې بیې لوړې شوې او د دغه هېواد د تېلو اونیز لګښت له شاوخوا ۳۰۰ مېلیون ډالرو نږدې ۸۰۰ مېلیون ډالرو ته لوړ شوی دی.
نوموړي زیاته کړه، د هرمز تنګي د کښتيو تګراتګ د فبرورۍ له ۲۸مې وروسته فلج پاتې شوی چې له امله یې د تېلو بازار ګډوډ شوی. شهباز شریف وړاندې ویلي، چې حالت اوس «د قناعت وړ» ښکاري.
د هغه په وینا، د تېلو لګښت د تېرو اوونیو پرتله کم شوی؛ خو نړۍوالې بیې لاهم لوړې دي. هغه وویل، له ولایتونو سره د سون توکو د مالي مرستو غځولو په اړه سلامشورې روانې دي او وضعیت په پرلهپسې ډول تر څار لاندې دی.
هغه ټینګار وکړ، چې پاکستان د جګړې تر پیل وړاندې په عمومي اقتصاد کې ښې نښې لرلې؛ خو «له جګړې سره زموږ د دوو کلونو هڅې په اوبو لاهو شوې». هغه وویل، د پورونو ادا کولو سره، سره چې پهکې متحده عربي اماراتو ته د ۳،۴۵ مېلیارده ډالرو پور هم شامل دی؛ فدرالي زېرمې لاهم «پر خپلې کچې ولاړې دي». هغه له سعودي عربستان نه مننه وکړه، چې ۳ مېلیارده ډالر یې ورسپارلي دي.
