د طالبانو د کور او ښار جوړولو وزارت خبر ورکړی، چې د دغه وزارت لپاره د یادې ډلې وزیر مولوي نجیبالله حیات حقاني ننګرهار ولایت ته د سفر پر مهال پر ۳۳۵ راستنو شویو کډوالو کورنیو د استوګنې نمرې وېشلې دي.
یاد وزارت د یوې خبرپاڼې په خپرولو سره ویلي، چې دغه نمرې د منظم پلان له مخې برابرې شوې دي؛ څو راستنو شویو کډوالو کورنیو ته د سرپناه زمینه برابره شي. د خبرپاڼې له مخې؛ دغه بهیر لاهم دوام لري او ټاکل شوې ده، چې په نږدې راتلونکې کې نورو کورنیو ته هم نمرې ورکړل شي.
د طالبانو د کور او ښار جوړولو وزیر مولوي نجیب الله حیات حقاني د یادو ځمکو د وېش پر مهال ویلي، د استوګنې نمرې وېش به د روڼتیا، عدالت او اړتیا پربنسټ ترسره کېږي.
د طالب چارواکو په وینا؛ له پنځو کلونو راهیسې څه باندې ۴نیم مېلیونه افغان کډوال د سیمې له هېوادونو په ځانګړې توګه له پاکستان او ایران نه بېرته افغانستان ته ستانه شوي دي؛ خو طالبانو په دې موده کې یوازې پر څه باندې ۱۰زره کورنیو د استوګنې نمرې وېشلې، چې د راستنېدونکو پرتله خورا کمې دي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
