د بدخشان په مرکز او د کشم- فیضاباد د لویې لارې په اوږدو کې د دوو ټرافیکي پېښو له امله ۶ کسان مړه او ۲۵ نور ټپیان شوي دي. د دغه ولایت لپاره د طالبانو د امنیه قومندانۍ مسوولین وايي، دغه پېښې نن مازدیګر (پنجشنبه د غويي ۱۰مه) رامنځته شوي او په قربانیانو کې ښځې او ماشومان هم شامل دي.
د بدخشان ولایت لپاره د طالبانو د امینه قومندانۍ ویاند احسانالله کامګار وايي، لومړۍ پېښه نن مازدیګر د کشم- فیضاباد تر منځ د لویې لارې اړوند په زماناباد اتن جلو سیمه کې د یوه لنډکروزر او یوه باروړونکي موټر د ټکر له امله رامنځته شوې ده.
د نوموړي په وینا، په دې پېښه کې د دوو ښځو او یوه ماشوم په ګډون ۵ کسان مړه او د یوې ښځې او ۴ ماشومانو په ګډون ۱۱ نور ټپیان شوي دي.
د بدخشان د اطلاعاتو او کلتور ریاست مسوولین بیا وايي، تر دغې پېښې مخکې د دغه ولایت په مرکز کې د یوې بلې ټرافیکي پېښې له امله ۱ کس مړ او ۱۴ نور ټپیان شوي دي.
ویل کېږي د پېښې ټپیان د درملنې په موخه روغتونونو ته لېږدول شوي، خو د پېښې رامنځته کېدو د څرنګوالي په تړاو لا تراوسه څه نهدي ویل شوي، مګر د دغه ډول پېښو لامل د موټر چلوونکو بې احتیاطي بلل کېږي.
