د خیبر پښتونخوا په نوشهره کې د افغان کډوالو درې پنډغالي په بشپړ ډول تړل شوي
د خیبر پښتونخوا ایالت د نوشهره ولسوالۍ ځايي چارواکو لهخوا د افغان کډوالو درې پنډغالي په بشپړ ډول تړل شوي دي. د ځايي چارواکو د معلوماتو له مخې؛ په دغه پنډغالو کې ۴۲زره افغان کډوال مېشت وو، چې له دې ډلې ۴۰زره یې افغانستان ته ستانه شوي او پاتې ۲زره کډوال د ستنېدو په حال کې دي.
د یادونې وړ ده، له دې ډلې د ترکمن پنډغالی، خیراباد پنډغالی او اکوړه خټک پنډغالی چې په ۱۹۸۰کال کې جوړ شوي وو؛ په بشپړه توګه خالي شوي او ځمکې يې د ځايي چارواکو لهخوا هوارې شوې دي. په دغه پنډغالو کې د ملګرو ملتونو د کډوالۍ ادارې لهخوا د افغان کډوالو لپاره برابرې شوې اسانتیاوې هم ځايي خلکو لپاره د ګټې اخیستنې په موخه اړوندو ادارو ته سپارل شوې دي.
دا په داسې حال کې ده، چې د پاکستان په بېلابېلو لویو ښارونو کې د افغان کډوالو د اېستلو عملیات په چټکۍ سره دوام لري. تازه د خیبر پښتونخوا د خیبر ولسوالۍ د لنډي کوتل مرستیال کمېشنر انعامالله وزیر افغان کډوالو ته ویلي، چې په یوه اونۍ کې خپل کاروبارونه راټول کړي او له یادې سیمې ووځي. نوموړي خبرداری ورکړی، که څوک له ټاکلې مودې وروسته هم په یادې سیمه کې پاتې شي؛ نو پر وړاندې به یې سخت قانوني چلند وشي.
ورته مهال د خیبر ولسوالۍ مرستیال کمېشنر د یادې سیمې ځایي اوسېدونکو ته خبرداری ورکړی، که هر چا افغان کډوالو ته د استوګنې لپاره کور یا د کاروبار لپاره هټۍ په کرایه ورکړه؛ نو له سخت قانوني چلند سره به مخ شي.
