د طالبانو تر واک لاندې د پېښو سره د مبارزې او امادګۍ ادارې د نړیوالو باوري بنسټونو د ارزونو پر بنسټ خبرداری ورکړی، چې د هېواد په شمالختیځ، ختیځ او مرکزي ولایتونو کې د سېلابونو راوتلو ګواښونه شته، په داسې حال کې چې په ځینو سیمو کې وچکالي او لوړې تودوخې هم دوام لري.
دغه ادارې پر ایکس خواله رسنۍ کې ویلي، چې د ۱۴۰۵ لمریز کال د غویي له ۱۰مې تر ۱۶مې نېټې پورې د هېواد د هوا پېژندنې وضعیت د وچکالۍ، ورښتونو او تودوخې له پلوه بېلابېل بدلونونه ښيي.
د راپور له مخې، په تېرو ۳۰ ورځو کې د هېواد په پراخو سیمو کې د بارانونو په کچه کې مثبت انحراف ثبت شوی، او په ځینو مواردو کې د باران اندازه له ۱۰۰ مليمتره هم لوړه شوې ده. خو د واورې د اوبو معادل ارزښتونه لا هم د اوسط په پرتله ټیټ پاتې دي، که څه هم د مارچ میاشتې په پرتله ښه والی پکې راغلی دی.
یاده اداره زیاتوي، چې د غیر عادي وچکالۍ وضعیت لا هم د هېواد په شمالختیځ، په ځانګړي ډول د بدخشان ولایت په ځینو برخو کې موجود دی.
په ورته وخت کې، د ورښتونو په برخه کې وړاندوینه شوې چې په شمالختیځو سیمو کې به د ۱۰ تر ۵۰ مليمتره پورې، او په مرکزي او ختیځو سیمو کې د ۵ تر ۲۵ مليمتره پورې باران وشي، چې ځینې ځایونه به له اوسط څخه لوړ وي. د همدې وضعیت له امله، په شمالختیځ، ختیځ او مرکزي افغانستان کې د سېلابونو د رامنځته کېدو خطر هم شته.
د راپور له مخې، په سویلختیځو او سویلي سیمو کې د سیندونو د اوبو جریان هم له منځني تر لوړ کچې پورې اټکل شوی دی.
د تودوخې په اړه دغه اداره وایي، چې د هېواد په ډېرو سیمو کې به اعظمي تودوخه له اوسط سره نږدې وي، خو په فراه ولایت، نیمروز ولایت او هلمند ولایت کې به تودوخه له ۳۵ درجې سانتيګراد څخه لوړه شي. همدارنګه د شمالي ټیټو سیمو په ځینو برخو کې هم ورته لوړه تودوخه اټکل شوې ده.
