د جمهوري نظام پر مهال د ولسي جرګې پخوانی غړی شاپور حسینزوی په یوه ویډیوي پېغام کې ویلي، چې کابل کې یې لورګانې تښتول شوي او طالبان یې په موندلو کې پاتې راغلي دي. هغه زیاته کړې: «د خلکو عزت باندې تاسې لوبې کوئ، دا نظام داسې دی چې د عزت خلک بې عزته کړي».
د نوموړي په وینا، اولادونه یې د کابل پنځمې حوزې اړوند سیمې څخه تښتول شوي دي او طالبانو تر اوسه پورې د موندلو لپاره یې اقدام نه دی کړی. هغه په کابل کې د طالبانو له قوماندانۍ څخه غوښتنه کړې چې په دغه قضیه کې جدي اقدامات وکړي.
تر دې وړاندې په کابل کې د طالبانو د امنیه قوماندانۍ ویاند خالد ځدراڼ ویلي وو، چې د ولسي جرګې پر دې غړي خپلې مېرمنې عریضه کړې او له همدې امله زنداني شوی هم دی. تېره اونۍ بیا شاپور حسینزوی پر خپله فېسبوک پاڼه ویډیو خپره کړه او دا یې تایید کړه چې زنداني شوی و، خو ادعا یې وکړه چې د هغه د بندي کېدو په تړاو دروغ ویل شوي.
د حسینزوی په وینا، د طالبانو له لوري یې زنداني کېدل یوه دسیسه وه، خو دا یې نه وه روښانه کړې چې کوم ډول دسیسه او په دې تړاو یې نور جزییات هم نه وو ورکړي.
شاپور حسینزوی په بیا بیا ځل نیوکه کړې، طالبانو ته ښه مالومه ده چې لوڼې یې تښتول شوي، خو بیا هم لازم اقدام نه کوي.
