د طالبانو یو امنیتي مسوول خپلو سرتېرو ته په دغه غږیز پيغام کې وایي، ولسوالۍ، قوماندانۍ او پوستو ته نامسووله کسان مه پرېږدئ چې کومه پېښه رامنځ ته نهشي. نوموړي ویلي، چې د کابل په میربچه کوټ ولسوالۍ کې یو کس په یوه پوسته کې طالبانو ته زهرجن خواړه ورکړي دي.
د یاد طالب مسوول د معلوماتو له مخې؛ تېره شپه د کابل په میربچه کوټ ولسوالۍ کې یو کس د طالبانو په یوې پوسته کې د یادې ډلې غړو ته زهرجن خواړه ورکړي دي. نوموړي ویلي:« یوه نوکریواله ډله پر کاري وخت بېهوښه شوې او طالبانو روغتون ته انتقال کړې».
لاتراوسه طالبانو په رسمي ډول د یادې پېښې په اړه څه نهدي ویلي. په دغه غږیر پیغام کې طالب مسوول د قوماندانۍ، ولسوالۍ او پوستو مسوولینو ته په خطاب کې وايي: «قوماندانۍ، ولسوالۍ او پوستو ته نامسووله کسان مه راولئ، سبا به کومه قضیه وشي بیا به مو ابرو نهوي پاتې. ټول متوجه واوسئ».
