د اوکراین پر اوډیسا ښار د روسیې په ډرون بریدونو کې ۱۸ کسان ټپیان شوي

د ځایي چارواکو په وینا؛ دغه بریدونو تر ټولو ډېر زیان په مرکزي پریمورسکي ولسوالۍ کې اړولی دی، چې له امله یې ګڼې استوګنیزې ودانۍ زیانمنې شوې دي. د بېړنیو خدمتونو ادارې بیا ویلي، چې ښایي د ټپیانو شمېره تر دې لوړه شي.
د دوشنبې په ورځ هم پر یاد ښار د روسیې د بریدونو له امله ۱۴کسان ټپیان شوي وو. د اوکراین هوايي ځواک ویلي، روسیې د چهارشنبې په ماښام پر دغه هېواد یو بالستیک توغندی او ۲۰۶ ډرونونه توغولي چې له دې ډلې ۱۷۲ ډرونونه شنډ شوي دي. یو توغندی او ۳۲ ډرونونه بیا پر ۲۲ بېلابېلو ځایونو لګېدلي دي.