بلوچستان کې په دوو جلا پېښو کې دوه کسان وژل شوي او درې نور ټپيان دي
د بلوچستان د کوټې ښار په بېلابېلو برخو کې بېګاه شپه له نامعلوم ځایه راکټونه توغول شوي. دغه راکټونه په ګوال منډۍ څلور لارې، میر احمد خان سړک، نجم الدین سړک، سرکي سړک، قمبراني سړک او شانتي نګر سیمو کې لوېدلي چې له امله یې درې کسان ټپیان شوي دي.
همداراز پر سرکي سړک یوې مدرسې ته هم زیان اوښتی او په ځینو سیمو کې استوګنیز ځایونه هم زیانمن شوي دي. تر دې مهاله کومې ډلې د دغه راکټونو توغولو مسوولیت نهدی منلی.
بل لور ته د بلوچستان مستونګ ولسوالۍ اړوند دشت سپلنجي کراس سیمه کې هم بېګاه شپه ناپېژاندو وسلهوالو دوه کسان په ډزو وژلي دي. د یادې پېښې په اړه نور جزییات نهدي ورکړل شوي.
په دې وروستیو کې د بلوچستان ایالت په بېلابېلو برخو کې هره ورځ د ورته پېښو راپورونه ورکول کېږي. وړمه شپه هم په بلوچستان ایالت کې د جلا، جلا پېښو له امله درې کسان وژل شوي او دوه نور ټپیان وو. یادې پېښې په عبدالله کلا او کوټې ښار کې شوې وې.
