فریډم نېټ ورک: په پاکستان کې د بیان ازادي له ګواښ سره مخ ده
په پاکستان کې د بیان ازادۍ او د خبریالانو خوندیتوب بنسټ «فریډم نېټ ورک» په خپل کلني راپور کې ويلي، چې په پاکستان کې د ۲۰۲۵کال له اپرېل څخه د ۲۰۲۶کال تر مارچ میاشتې پورې د بیان ازادۍ فضا د بېلابېلو قانوني، تنظیمي او اقتصادي فشارونو له امله خورا محدوده شوې ده.
د راپور له مخې؛ په پاکستان کې د سایبري جرمونو د مخنیوي قانون «پیکا» د ۲۰۲۵کال تر ټولو اغېزمنه وسيله ګرځیدلې، چې د ۲۰۲۵کال په موده کې د مشروع څرګندونو د جرم ګرځولو، د مخالفتونو خاموشه کولو او د خبریالانو، وکیلانو او سیاسي شنونکو د وېرولو لپاره کارول شوې ده.
په دې اړه د فریډم نېټ ورک مشر اقبال خټک ويلي، د پیکا قانون له امله داسې فضا رامنځته شوې چې خبریالان د ځان سانسورولو ته اړ شوي او روان وضعیت د پاکستان د رسنیو ازادي له جدي ګواښ سره مخ کړې ده.
په راپور کې راغلي، چې لسګونه خبریالان د «پیکا» تر پوښښ لاندې له حقوقي قضیو سره مخ شوي او ترڅنګ يې د بدنامۍ دعوې او انټرنېټي بندیزونو د خپلواکه خبريالۍ ساحه لا تنګه کړې ده.
د راپور د معلوماتو له مخې؛ د خبریالانو په خوندیتوب کې لږترلږه ۱۲۹ تایید شوې سرغړونې ثبت شوې، چې دوه وژنې، د وژنې پنځه ګواښونه، ۵۸ حقوقي قضیې، ۱۶ فزیکي بریدونه، ۱۱ د زیان ګواښونه او د تښتونې او جبري ورکېدو دوه پېښې هم پهکې شاملې دي.
پنجاب او خیبر پښتونخوا تر ټولو خطرناک ایالتونه بلل شوي او په سند او بلوچستان کې هدفي وژنې لا پراخې شوې دي. په دغه پېښو کې د دولتي ادارو ونډه تر ۶۰ سلنې زیاته اټکل شوې او نادولتي وسلهوالې او جرمي ډلې هم په ګواښونو او تاوتریخوالي کې ښکېلې دي.
