مسعود پزشکیان او محمدباقر قالیباف د عباس عراقچی د لرې کولو غوښتنه کوي
د ایران دننه دوو باخبره سرچینو ایران انټرنشنل ته ویلي، چې د ایران ولسمشر مسعود پزشکیان او د پارلمان رییس محمدباقر قالیباف د بهرنیو چارو وزیر عباس عراقچی لهخوا د ډیپلوماسۍ، په ځانګړي ډول د اټومي خبرو اترو د پرمخ وړلو له کړنلارې ناخوښ دي او د هغه د لرې کولو غوښتنه کوي.
دغو سرچینو، چې د اجراییه او مقننه قوې د مشرانو ترمنځ له روانو خبرو خبر دي، ویلي چې پزشکیان او قالیباف باور لري چې د بهرنیو چارو وزیر په وروستیو اوونیو کې د خپل اصلي مسوولیت پر ځای، چې باید د دولت د پالیسۍ عملي کوونکی وي، زیاتره د احمد وحیدي (د سپاه پاسداران قوماندان) د مرستیال په څېر چلند کړی دی.
د سرچینو په وینا، عراقچي په تېرو دوو اوونیو کې د پزشکیان له خبرتیا پرته، د وحیدي سره په بشپړه همغږۍ او د هغه د لارښوونو پر بنسټ عمل کړی دی.
دې حالت له پزشکیان څخه سخت ناراضیتوب رامنځته کړی او نوموړي خپلو نږدې کسانو ته ویلي چې که دا وضعیت دوام وکړي، نو عراقچي به له خپلې دندې لرې کړي.
تر دې مخکې هم د ایراني چارواکو ترمنځ د اختلافاتو راپورونه خپاره شوي وو. د وري میاشتې په اتمه هم د پزشکیان او احمد وحیدي ترمنځ د جدي اختلافاتو د رامنځته کېدو راپورونه ورکړل شوي وو.
