خوست کې د طالبانو ولایتي رسنیز دفتر ویلي، د باغ سموات صنعتي پارک کې د صنعتي ودې او پراختیا په موخه د شاوخوا ۷۰ فابریکو د جوړېدو چارې په چټکۍ روانې دي. د معلوماتو له مخې، دغه پارک چې پر شاوخوا ۴۰۰جریبه ځمکه جوړېږي، په کې به نږدې ۲۰۰ لویې او وړې تولیدي فابریکې فعالیتونه ترسره کړي.
د یاد دفتر په وینا، دا مهال د شاوخوا اویا بېلابېلو تولیدي فابریکو ساختماني کارونه روان دي او ټاکل شوې، چې د پاتې نورو فابریکو د جوړولو چارې هم په نږدې راتلونکي کې پیل شي. د طالبانو خبرپاڼه کې راغلي، چې دوی د سوداګرو او صنعتکارانو د ملاتړ په برخه کې خپلې ژمنې تکراروي او د اسانتیاوو د برابرولو ډاډ ورکوي.
د طالب چارواکو په خبره، د صنعتي پارک د چارو د لا چټکتیا، شفافیت او معیاري تطبیق لپاره به اړینې اسانتیاوې برابرې شي. همدارنګه ټینګار شوی چې له صنعتکارانو سره هر اړخیزه همکاري به دوام ومومي، څو پروژه په ټاکلي وخت او لوړ کیفیت سره بشپړه شي.
خوست کې د طالبانو ولایتي رسنیز دفتر په بیان کې راغلي، چې یاده پروژه به د کاري فرصتونو په رامنځته کولو، د کورنیو تولیداتو په زیاتوالي او د سیمهییز اقتصاد په پیاوړتیا کې مهم رول ولوبوي. د یاد پارک له فعالېدو سره د خوست په کچه د تولید کچه لوړېدونکې بلل شوې او د صنایعو د بنسټیز بدلون لپاره پرې حساب شوی دی.
