ډیموکراټ سناتور: پر ایران پوځي برید 'ډېر نږدې' دی
ډیموکراټ سناتور ریچارډ بلومنټل خبرداری ورکړی، چې د محرمو معلوماتو پربنسټ په نږدې راتلونکي کې د ایران پر وړاندې د پوځي برید احتمال ډېر لوړ دی. هغه دغه احتمال «د اندېښنې وړ» وباله او ویې ویل، دغه ډول کړنې کولای شي د امریکایي سرتېرو ژوند له ګواښ سره مخ کړي او پراخ تلفات رامنځته کړي.
نوموړي سياېناېن ته ویلي، چې د ایران په اړه د معلوماتو او هغه سرچینو پر بنسټ چې هغه یې لري، «د پوځي برید په اړه معلومات د مېز پر سر دي». دغه څرګندونې داسې مهال دي، چې د بېلابېلو سرچینو په وینا؛ په واشنګټن کې د ایران پر وړاندې د پیاوړو بریدونو او ان د ځمکنیو ځواکونو د حضور سناریوګانو په ګډون د پوځي انتخابونو په اړه غور کېږي.
