نصیر احمد فایق په دایکندي کې د طالبانو له لوري د ښځو د جنسي ځورونې اړوند د افغانستان انټرنشنل راپور ته غبرګون ښودلی دی. نوموړي، دغه کړنې له بشري او اسلامي حقونو ښکاره سرغړونه بللې او د طالبانو تر واکمنۍ لاندې یې د «فساد او ظلم» یوه بېلګه ګڼلې ده.
په ملګرو ملتونو کې د افغانستان د استازولۍ سرپرست نصیر احمد فایق په خپله اېکسپاڼه لیکلي، چې له دایکندي څخه دا ټکان ورکوونکی راپور ښيي، چې افغان ښځې نه یوازې له زدهکړو، کار او په ټولنه کې د ګډون له حقونو بېبرخې دي، بلکې له جنسي زورزیاتيو، ګواښونو او ځورونو سره هم مخ دي. هغه دغه وضعیت د طالبانو د «اسلامي واکمنۍ» یوه بېلګه بللې ده.
فایق زیاته کړې، چې په دایکندي کې له یوې واده شوې ښځې سره جبري نکاح، د خبریالانو زنداني کول او په هرات کې د ښځو نیول د حاکم «استبداد» نورې بېلګې دي. هغه ټینګار کړی، چې له وېرې د قربانیانو چوپتیا د قانون او عدالت د نشتوالي ښکارندویي کوي او همداراز یې له نړیوالې ټولنې او د بشري حقونو له بنسټونو غوښتي، چې دا «جنایتونه» مستند کړي او بېتفاوته پاتې نهشي.
دا غبرګون وروسته له هغه ښودل کېږي، چې افغانستان انټرنشنل د شنبې په ورځ د دایکندي د یوې اوسېدونکې د غږیز پیغام پر بنسټ یو راپور خپور کړ. په دغه راپور کې راغلي، چې د طالبانو چارواکي او د هغوی تر ملاتړ لاندې زورواکي په دولتي ادارو او روغتیایي مرکزونو کې له مجردو او واده شویو ښځو څخه د جنسي اړیکو غوښتنه کوي.
پر افغانستان د طالبانو له بیا واکمنېدو وروسته، پر ښځو سخت محدودیتونه لګول شوي او دغه ډله په پراخه کچه د بشري حقونو پر سرغړونو تورنه ده. د راپورونو لهمخې، په ټول هېواد کې خپلسري نیونې، په عام محضر کې د درو وهل او هدفي وژنې زیاتې شوي، چې له امله یې افغانستان د ناحقه نیونو په نړیوال نوملړ کې شامل شوی او نړیواله انزوا یې لا پسې ژوره شوې ده.
