د کډوالو د نړیوالې ورځې په مناسبت، د جرمني په توبینګن ښار کې د «افغانستان د ښځو پر وړاندې د جنسیتي اپارتاید پر ضد» تر سرلیک لاندې یوه روزنیزه او مدافعتي غونډه جوړه شوې، چې پکې د افغان ښځو د حقونو د ملاتړ او د جنسیتي تبعیض پر وړاندې د مبارزې پر لارو چارو بحث شوی.
دغه ورکشاپ د «نړیوالې عدالتغوښتونکو ښځو شبکې» له لوري د «موو ان» (Move On) سازمان د لسمې کلیزې په مناسبت جوړ شوې. د غونډې موخه په جرمني کې د مېشتو افغان کډوالوښځو ترمنځ د اړیکو پیاوړتیا، د شبکې جوړول او د ښځو د حقونو په برخه کې د تخصصي زدهکړو او تجربو شریکول و.
ګډونوالو د طالبانو تر واکمنۍ لاندې د افغان ښځو او نجونو پر وضعیت، د زدهکړو او کار محدودیتونو او د جنسیتي اپارتاید پر ضد د نړیوالو هڅو پر اړتیا خبرې وکړې.
د غونډې په څنډه کې د افغان ښځو د ملاتړ او د هغوی د وضعیت د نړیوال انعکاس لپاره یو سمبولیک لاریون هم ترسره شو. ګډونوالو له نړیوالې ټولنې وغوښتل چې د افغانستان د ښځو او نجونو د حقونو د خوندیتوب لپاره خپلې هڅې زیاتې کړي.
دا غونډه داسې مهال جوړه شوې چې د بشري حقونو یو شمېر بنسټونه او د ښځو د حقونو فعالان د طالبانو پر تګلارو نیوکه کوي او د ښځو پر وړاندې د محدودیتونو دوام د جنسیتي اپارتاید یوه بېلګه بولي.
