د طالبانو د حکومت ویاند ذبیحالله مجاهد ویلي چې که د پاکستان له لوري پر افغانستان بریدونه دوام وکړي، نو د کابل له لوري د پاکستان سفارت تړل هم یو له ممکنه انتخابونو څخه دی، خو په اوسني وخت کې د ده په وینا د طالبانو حکومت باید زغم او حوصله ولري.
مجاهد طلوع نیوز سره په یوه مرکه کې ویلي چې افغانستان تر اوسه له پاکستان سره په پراخ جګړهییز وضعیت کې نه دی داخل شوی او لا هم د ډېپلوماټیکو لارو د کارولو فرصت شته. هغه زیاته کړې چې د سفارت تړل کېدل یوه شونې تګلاره ده، خو اوس مهال لومړیتوب صبر او د وضعیت ارزونه ده.
نوموړي ټینګار کړی چې په پاکستان کې د افغان کډوالو شتون او د خلکو تګ راتګ ته په کتو، د ډېپلوماټیکو اړیکو پرېکون باید په احتیاط سره وشي.
مجاهد ویلي: «موږ لا تر اوسه له پاکستان سره په لوی جنګ کې نه یو ښکېل شوي، وخت شته چې د سفارت په تړلو غور وکړو، نورې لارې چارې هم لرو.» هغه زیاته کړې چې سفارتونه د خدماتو لپاره دي او باید د خلکو حقوق ترې زیانمن نه شي.
بل لوري ته، د جمهوریت پر مهال د اطلاعاتو او کلتور وزارت پخواني معین ذردشت شمس بیا د ذبیحالله مجاهد د دریځ په غبرګون کې ویلي چې یوازې د سفارت ساتل یا د اړیکو دوام کافي نه دی، بلکې د «دښمن سفیر» باید وشړل شي او د ډېپلوماتیکو اړیکو کچه باید ټیټه شي.
هغه په خپل ایکسپاڼه کې لیکلي چې د پاکستان سفارت باید یا د یوې ټیټې کچې ډېپلوماټیکې ادارې له خوا اداره شي او یا هم د سفیر د شړلو له لارې د اړیکو کچه راکمه شي.
شمس زیاته کړې چې له داسې هېواد سره چې د هغه په وینا د افغانانو د ملکي تلفاتو مسوول دی، عادي ډېپلوماټیکې اړیکې ساتل د منلو وړ نه دي او باید د اړیکو کچه تر ډېره ټیټه شي.
